眾所周知，歐美國家嘅人名都係採用「名+姓」嘅結構，通常姓氏會用返爸爸嘅姓，最多中間攝多個middle name，但係西班牙人嘅改名嘅方法原來有少少唔同嘅，就係佢哋除咗爸爸個姓之外，仲會採用埋媽媽個姓，所以佢哋嘅改名結構係咁嘅：「名+父姓+母姓」。
而西班牙最常見嘅姓氏如下：
1. García
2. Rodríguez
3. González
4. Fernández (小編都係呢個姓:)
聰明嘅你可能會發現，佢哋嘅姓氏好多都以-ez收尾，其實就係「某某之子」嘅意思，類似英文以-son收尾嘅姓氏，都有同樣意思。
另外，如果父母想嘅話，佢哋甚至可以幫仔女改兩個名，咁佢哋成個名就會係「名+名+父姓+母姓」。舉個例子，如果一個女仔嘅名係 “María Carmen”，而佢爸爸姓Rodríguez，媽媽姓García ，咁佢全名就會係 “María Carmen Rodríguez García”喇～
之前就講過對西班牙人嚟講，送禮物嘅象徵人物係「東方三賢」，又稱「三皇」。今日就講下屬於佢哋嘅節日 —「三皇節」。
「三皇節」其實就類似我哋所熟悉嘅boxing day，但係同傳統嘅Boxing Day唔同，西班牙人拆禮物嘅日子唔係12月26號而係1月6號，而送禮物嘅角色正正就係三皇（當然實際上就係家中長輩負責送禮物俾後輩或者小朋友）。至於我哋所熟悉嘅聖誕老人，喺西班牙就被稱為Papá Noel，係一個重要性相對低啲嘅聖誕角色。
咁呢一日究竟有幾緊要？佢除咗係全國嘅公眾假期，亦都標誌住聖誕正式完結、新一年即將開始。傳統上，一家大細會喺呢一日聚首一堂，一齊食一款名為”Roscón de reyes”嘅甜品。簡單嚟講，佢就係一款巨大化嘅環狀忌廉檳，特別之處在於佢嘅餡當中會收埋兩個驚喜：一粒豆同一個國王嘅模型仔。如果你食嗰嚿蛋糕入邊發現到粒豆，你就要負責俾成份甜品嘅錢；但如果你發現到嘅係國王模型， 咁你就可以戴上隨蛋糕附送嘅紙皇冠👑，加冕成為國王，象徵住來年會好運嘅意思～
話咁快嚟到2023年，首先祝大家新年快樂！🎆 講起除夕夜，當然不得不提西班牙人嘅過年習俗 — 食提子🍇
西班牙嘅除夕夜叫”nochevieja”，當正式進入新一年嘅0時0分，新年嘅12下鐘聲就會敲響，西班牙人會跟住每下鐘聲食一粒提子，總共12粒，每粒代表住來年嘅各個月份，喺12下鐘聲之後成功吞晒所有提子就代表來年順順利利喇～
據聞呢個習俗嘅出現係因為1909年嘅西班牙經歷咗一場提子大豐收，果農為咗促銷，就提出咗「幸運提子」嘅宣傳，叫國民一齊喺倒數嘅時候食12粒提子，話會帶嚟好運。點知呢個宣傳非常成功，呢個習慣亦都慢慢流傳落嚟，隨之變成而家嘅倒數習俗。
全世界嘅聖誕節都一樣㗎啦～
如果你咁諗，咁就大錯特錯喇！西班牙嘅聖誕節唔只得12月24-26號，送禮物嘅象徵人物都唔係聖誕老人，想知點解？就睇落去啦！
♦️ 西班牙冇聖誕老人？
喺香港，我哋對「聖誕老人」嘅印象不外乎就係個留住白色鬍鬚、著住紅色衫、夜晚會騎鹿車周圍送禮物俾細路仔嘅老人家。不過你又知唔知，原來對西班牙人嚟講，負責送禮物比小朋友嘅並唔係我哋所熟悉嘅聖誕老人，而係「東方三賢」。
「東方三賢」係三位喺耶穌出世嘅時候由東方嚟朝拜嘅賢士，佢哋每人都帶咗一份禮物獻比耶穌。西班牙因此以東方三賢象徵聖誕送禮物嘅角色。
呢三位賢士分別係Melchor, Gaspar 同埋Baltasar，雖然後人冇詳細記載佢哋嘅身份，但係普遍都認為佢哋係精通天文學嘅智者。隨時代推移，三賢士嘅形象喺西班牙已經演變為三國王，並且被描述為嚟自唔同種族：Melchor為白人，嚟自歐洲大陸；Gaspar為黃種人，嚟自亞洲；Baltasar為黑人，嚟自非洲。
♦️ 西班牙嘅聖誕節係22號開始？
冇錯，有別於香港，22號喺香港係冬至，但西班牙就已經正式開始咗聖誕節喇，因為呢日係一年一度「肥仔」彩票開鑼嘅日子！
♦️ 法蒂瑪之手篇
承接上個post所介紹嘅阿爾罕布拉宮，今次就深入少少，講埋皇宮入面一個不得不提嘅重要象徵，佢就係早前嘅post同story都有介紹過嘅「法蒂瑪之手」！
法蒂瑪之手對穆斯林嚟講係個重要嘅護身符，用嚟對抗邪惡之眼🧿，呢個象徵喺中東同北非尤其流行，但佢最早其實係出現喺阿爾罕布拉宮的入口 — 正義之門上（即上圖）。穆斯林認為呢個手掌係先知穆罕默德個女法蒂瑪嘅右手，代表純潔無罪，五指分別代表伊斯蘭教嘅五大支柱，即「念証、禮拜、齋戒、天課和朝覲」，因此係個神聖象徵。
正義之門上嘅法蒂瑪之手其實仲有一個傳說：門上除咗刻有法蒂瑪之手，仲有天國之鑰，相傳當法蒂瑪之手攞到天國之鑰嘅時侯，阿爾罕布拉宮就會倒塌，而天國之門就會開啟。呢個設定係韓劇《阿爾罕布拉宮的回憶》都有採用嘅情節嚟！
時至今日，法蒂瑪之手已經變成唔少飾物同紋身嘅參考樣式，手心有眼睛嘅設計亦都成為咗主流版本，留意返佢唔係邪惡之眼，而係與之抗衡嘅符號，所以採用呢個設計🪬嘅飾物，係帶有祝福、好運、驅走邪念嘅意思㗎！
P.S. 我哋網店都有各類法蒂瑪紋式嘅產品，中意嘅話就帶佢哋返屋企啦！話唔定為你同身邊嘅人帶嚟好運㗎～
♦️阿爾罕布拉宮篇
有睇過韓劇《阿爾罕布拉宮的回憶》嘅朋友都知道，套劇嘅主要取景地就係西班牙嘅格拉納達，而劇情所圍繞嘅阿爾罕布拉宮有咩咁特別，令到韓劇製作組都要慕名而來？咁就要睇以下介紹喇～
阿爾罕布拉宮係一座13世紀建造嘅阿拉伯式宮殿，包含住庭院、宴客廳、花園、瞭望塔等建築。上個po就講過格拉納達曾經被阿拉伯帝國入侵並統治過一段時間，呢個宮殿正正係當時嘅阿拉伯人興建嘅，因此帶有濃厚嘅伊斯蘭教色彩，例如宮殿入口嘅正義之門刻有法蒂瑪之手🪬同天國之鑰嘅圖樣。獅子庭院當中嘅噴泉亦將水引向四條小渠，象徵住伊斯蘭教四條「天堂之河」。呢啲都係伊斯蘭教嘅重要象徵。
除此之外，宮殿中嘅庭院都採用咗典型伊斯蘭教嘅建築方式，例如運用咗幾何、花卉、星形圖案密鋪殿中嘅圓柱同拱頂，以顯示佢哋對宇宙精密度同創造性嘅敬畏。以及仲有唔少華麗又精緻嘅景點值得一提，但係礙於篇幅就唔逐一介紹喇，留待大家睇劇/親臨宮中嘅時候自行發掘～
總之呢，呢座宮殿之所以咁出名，係因為佢極具歷史、文化、建築同宗教價值，甚至喺上世紀佢就已經被列入世界文化遺產嘅名錄當中。所以話，如果大家有機會去西班牙旅行，呢個絕對係必去景點嚟㗎！
㩒過入我哋網店嘅朋友仔應該唔難發現店入面有好多帶中東色彩嘅products，可能你會問：「呢個唔係西班牙page嚟嘅咩？點解啲嘢好似唔關西班牙事嘅？」
好問題！呢個原因就要追溯返幾百年前嘅歷史喇，事關公元8世紀嘅時候，阿拉伯帝國版圖由中東經北非大舉擴張至西班牙，呢班勇悍嘅戰士就係信奉伊斯蘭聖戰嘅穆斯林。佢哋喺西班牙嘅據點就係現今南部嘅格拉納達，雖則之後唔同嘅基督教王朝同伊斯蘭王朝都有過幾次戰爭，但係強悍嘅穆斯林一直掌控南部格拉納達嘅主權，直至公元15世紀先被攻陷。
經歷超過700年嘅伊斯蘭王朝洗禮，西班牙南部嘅格拉納達已經變成「中(東)西(班牙)合璧」嘅代名詞：一方面佢吸收咗大量中東穆斯林色彩嘅建築、宗教同文化，另一方面亦都保留住西班牙原有基督教同天主教色彩嘅社會建設同習俗，形成咗有別西班牙北部嘅獨特風彩。
所以你哋喺網店見到嘅「中東」products，其實都係現今西班牙南部嘅特產嚟，呢啲產物吸收咗阿拉伯、北非、土耳其等地嘅宗教同文化，繼而演化成獨有嘅地區產物，帶有異國風情之餘，都承載咗深厚嘅歷史㗎～
喺香港，食完嘢昏昏欲睡嘅狀態叫做「飯氣攻心」，而香港人對抗「飯氣」嘅方法通常就係飲奶茶咖啡，務求唔會做做下嘢恰眼瞓。但係，西班牙人就啱啱相反，既來之，則「瞓」之，佢哋平日晏晝係有一段瞓晏覺時間嘅，對於有得瞓晏覺呢樣嘢亦都感到好自豪。
呢個晏覺時段通常處於2pm-5pm之間，正如之前營業時間篇所講，唔少店舖喺呢段時間期間係會閂門嘅，打工仔逢親食完晏都會小休一陣、瞓陣晏覺，長短不拘，到5點再返去開工。至於點解會有呢個文化，有人話係為咗避開夏天最熱嘅時段，亦都有人話係源自西班牙內戰後嘅時期，好多人為咗賺錢而打兩份工，一份早更一份夜更，所以就想盡量攞兩份工中間嘅時間嚟休息，隨後逐漸形成呢個晏覺文化。
邊個說法屬實就不得而知，淨係知西班牙人至今仍然推崇瞓晏覺嘅習慣，對佢哋嚟講，瞓晏覺可以紓緩壓力，又令個人精神啲，係件百利而無一害嘅事。
♦️營業時間篇
你有冇試過想買嘢但係食閉門羹？喺香港呢個情況未必好普遍，多數鋪頭都早開晏收，甚至開足24/7嘅都大有人在，最多係遇著「東主有喜 放假一天」先可能撞一兩次板。但係，嚟到西班牙就唔同講法喇，如果你帶住得閒落街買吓嘢嘅諗法嚟，你會有9成9機會係買唔到嘢㗎！
點解？因為西班牙嘅鋪頭係「間歇性開放」嘅，意思係佢哋鋪頭開到晏晝嘅時候，會放幾個鐘飯，期間閂一閂鋪，食完之後再開返。正如之前飲食篇所提及，西班牙人食晏時間係由2pm到5pm嘅，呢個食飯時間適用於顧客，都適用於多數老細同打工仔。所以如果你諗住食完飯去買吓嘢行吓街，通常都會撞板，因為店主都好可能仲嘆緊佢杯咖啡。至於5pm後開唔開返、又或者開到幾點，就因「店」而異喇～
「咁禮拜六日去買實冇死啦掛」，如果你咁諗就唔好意思喇，都係唔啱嘅，因為你放假，佢哋都會放！禮拜六嘅舖頭通常最多開到晏晝兩點，打後就閂門㗎喇，換句話說即係開半日；禮拜日就9成鋪頭都閂晒門添，因為佢哋好重視休息，通常禮拜日所有人都唔會返工做嘢嘅。
所以結論係，喺西班牙買嘢一定要check鋪頭嘅營業時間，最穩陣就係禮拜一至六嘅晏晝2pm前，如果唔係就要等多3個鐘、又或者等第二日㗎喇～
⛑：上述資料有可能唔適用於大型連鎖店或較商業化嘅地區
♦️打招呼篇
同好多其他亞洲地區一樣，香港人打招呼嘅方法通常係握手。但係對熱情嘅西班牙人嚟講，正式嘅打招呼係「動口不動手」嘅，亦即係所謂嘅「貼面禮」。
喺西班牙，「貼面禮」嘅主流做法係同對方面貼面、嘟起嘴輕輕「啜」一聲，留意嘴係唔需要真係掂到對方嘅，只需要「錫空氣」就ok。而順序嚟講，通常都係由雙方嘅右邊面開始，再到左邊，各錫一啖，總共兩下。歐洲會行貼面禮嘅國家仲有法國、葡萄牙等，但係錫嘅次數就由1至4啖不等。
有趣嘅係，行唔行貼面禮好睇雙方嘅默契，有時候某啲朋友要見幾次面熟絡咗先會咁做，但亦都有比較熱情嘅係會一嚟就會直接錫啖先，唔理識唔識都好。對於本身唔識嘅男女呢，就通常由女仔決定行唔行貼面禮，如果男仔太心急衝埋去，而女方縮咗縮，情況就可能變得好尷尬喇～
所以話，呢個打招呼方式好講求身體語言嘅觀察同埋「唔怕生」嘅性格，識睇眉頭眼額嘅就會快啲適應，而內斂少少嘅就可能需要多啲時間喇。
打親招呼，香港人都慣咗問句「你食咗飯未呀？」一餐飯除咗用嚟填肚，更加係大家敘舊傾計嘅場合。不過如果攞呢個問題問西班牙人嘅話，99%都肯定會話「未！邊會咁早食吖？」
冇錯，西班牙人絕對係全世界最遲食飯嘅民族！簡單嚟講，將香港人嘅飯鐘褪遲兩至三粒鐘，就大概係西班牙人嘅食飯時間喇～ 以下我哋就詳細啲比較吓西班牙人同香港人嘅三餐有咩分別啦！
♦早餐篇
對於要翻工翻學嘅人，平時大概都係7-8am食早餐，當然西班牙嘅打工仔都唔例外，但係有趣嘅位在於，佢哋係會食第二餐早餐㗎，即係我哋平時講嘅”brunch” ！點解會咁？係因為唔少公司都會喺10-11am左右放個break仔，俾佢哋出去飲杯咖啡、食啲小食，所以唔少西班牙人都會有食兩次早餐嘅習慣。
不過，早餐喺西班牙傳統並唔係好重要，好多人翻工前只係飲杯咖啡，放break先食兩條churros咁，唔志在食多，最緊要夠chill，叉夠電再翻去做嘢。
♦午餐篇
論重要性，晏晝飯絕對係西班牙人最重要嘅一餐。即係有幾重要？唔講你都未必知，就算係打工仔都足足有三個鐘放晏晝飯時間，食飽瞓個晏覺都仲得添。
抽過煙的人會懂抽煙的愉悅！沒有抽過煙的人，我會說你的人生可能看不懂某些重要的事，享受不到某些美好！煙草，是心與靈魂對話時及獨處時的最佳伴侶！
那支煙燃點起的時候，所有煩惱似乎可以按下暫停，心可以有一刻喘息，壓力可以緩一緩！當那口煙從肺部深深吸入，煙霧在口腔，鼻孔滾動，味覺，充滿尼古丁，雲霧緩緩從鼻孔呼出，看著那團白煙飄浮於空氣中，彷彿可以把所有他媽的不快隨著煙霧消逝，非常療愈！！
今天聽到這位朋友說要戒煙了，他巳五十有多，抽了四十多年香煙，可惜呀，對的，是可惜的，每當聽到有人要戒煙我是同時覺得悲哀，同時又替他高興的複雜心態，人生充滿矛盾！
朋友是一位用腦工作的人，很熱愛工作，做創意的工作，每當工作起來，日以繼夜，基本上他給我的感覺就是工作狂加一支煙！當然亦因為過份勞累子多年，得來一身的病痛，聽他說要戒煙不下十多次，今天他說這一次，一定要戒掉，我知道，他這次會成功的，因為沒有退路了，身體已經發出警號！