【西班牙嘅聖誕節究竟有幾特別？| 文化差異—聖誕篇🎄】

全世界嘅聖誕節都一樣㗎啦～
如果你咁諗，咁就大錯特錯喇！西班牙嘅聖誕節唔只得12月24-26號，送禮物嘅象徵人物都唔係聖誕老人，想知點解？就睇落去啦！

♦️ 西班牙冇聖誕老人？

喺香港，我哋對「聖誕老人」嘅印象不外乎就係個留住白色鬍鬚、著住紅色衫、夜晚會騎鹿車周圍送禮物俾細路仔嘅老人家。不過你又知唔知，原來對西班牙人嚟講，負責送禮物比小朋友嘅並唔係我哋所熟悉嘅聖誕老人，而係「東方三賢」。

「東方三賢」係三位喺耶穌出世嘅時候由東方嚟朝拜嘅賢士，佢哋每人都帶咗一份禮物獻比耶穌。西班牙因此以東方三賢象徵聖誕送禮物嘅角色。

呢三位賢士分別係Melchor, Gaspar 同埋Baltasar，雖然後人冇詳細記載佢哋嘅身份，但係普遍都認為佢哋係精通天文學嘅智者。隨時代推移，三賢士嘅形象喺西班牙已經演變為三國王，並且被描述為嚟自唔同種族：Melchor為白人，嚟自歐洲大陸；Gaspar為黃種人，嚟自亞洲；Baltasar為黑人，嚟自非洲。

♦️ 西班牙嘅聖誕節係22號開始？

冇錯，有別於香港，22號喺香港係冬至，但西班牙就已經正式開始咗聖誕節喇，因為呢日係一年一度「肥仔」彩票開鑼嘅日子！

「肥仔」彩票，即係西班牙聖誕彩票，係由西班牙文名 “El Gordo” 直譯而嚟，係西班牙全年獎金最高嘅彩票，頭獎係40萬歐羅，因此係所有西班牙人都非常期待嘅日子，唔少人都會湊埋一家大細去買幾張搏下運氣。由於呢日嘅重要性好高，所以普遍都被默認為聖誕嘅開始。

除咗獎金「肥美」，佢公佈結果嘅分式都為人津津樂道，因為佢唔只係得部攪珠機咁簡單，而係由細路仔將數字唱出嚟嘅，相傳呢項傳統已經有200年歷史㗎喇，至今仍然沿用緊。

♦️24號晚聖誕大餐

12月嘅24、25號對西班牙人嚟講，係同屋企人共聚天倫嘅日子，佢哋最重要嘅環節就係同屋企人一齊食晚飯喇。由於好多出咗埠嘅仔女都係每逢聖誕先返老家探屋企人，唔少屋企都會煮定兩至三日嘅聖誕大餐去慶祝。講緊嘅係24號晚食剩嘅隔夜飯餸，佢哋可能要食埋25、26號嘅午餐同晚餐先清得曬，可想而知佢哋24號煮嘅份量究竟有幾誇張！

至於會食啲咩，當然就充滿儀式感啦：首先唔少得兩三碟家常前菜，例如聖誕雞湯、芝士配西班牙火腿等；然後會有主菜，佢哋最經典嘅聖誕主菜一定係烤羊腿！配埋焗薯就係完美嘅主菜喇；食到咁上下當然唔少得一兩杯酒啦，喺聖誕節呢個咁重要嘅節日，佢哋通常會小酌幾杯紅酒白酒或者香檳，加添幾分儀式感；最後佢哋仲有個專屬平安夜嘅甜品，名為tronco de navidad，即係聖誕樹幹蛋糕，簡單嚟講就係放滿聖誕裝飾嘅瑞士卷。另外，仲會有唔同硬度同口味嘅鳥結糖，都係每家每戶必備嘅甜品嚟㗎！