【四兩撥電話】
闔家去戲院捧港產片場,估唔到自己會成為成套片最好笑嘅笑位。老人家中途要去洗手間,落樓梯實在太黑,我緊隨後面開手提電話燈照住堂樓梯,觸動咗老豆神經,猛話:「唔駛唔駛」,聾爸其實唔知自己聲量唔細,我冇爭辯,怕嘈住人,默默做二仔底死跟,照一照安全啲好,有人要怪老人家我都冇辦法,點知佢捩手撥開我,結果梗係撥埋我個電話落地,佢繼續用「唔駛啦!」諗住打圓場,我深信佢係聽唔到我「o殊」 佢,尷尬到一個點。去到門口,我冇再跟出去,費事佢再發難。返嚟嘅時候,佢主動走開去坐前排,唔再擾攘。我就順勢幫要返原來座位嘅阿媽,換來嘅結果,係快速返到位時家姐回頭講:「唔該。」先發現我唔係帶位員。
完場後笑笑口同家人講返件事,老豆仍然理直氣壯覺得係我唔啱。我細細聲揶揄佢話我電話壞咗要三千八蚊,佢諗都冇諗就拎自己部電話出嚟,叫我用佢嗰部,非常精靈。
其實佢都唔係第一次撥開我,有次病到五顏六色都唔要人扶,一手揈開我,揈完自己企唔穩都試過,老人家就是任性,暫時佢係唯一一個可以撥開我而我冇嬲嘅人。(冇嬲,只係有吹漲感。)