让你的ChatGPT成为有灵魂的得力助手

有无试过明明你同你朋友用紧同一个ChatGPT，输入同一段prompt，出嚟嘅结果就好似一个系五星大厨煮出嚟嘅烩饭，另一个就似微波炉叮出嚟嘅饭盒？明明一样煮法，一样材料，点解味道差咁远？系咪你部ChatGPT出厂设定有问题？唔好咁快闹AI，其实最大分别，唔喺佢，而系你。

讲到底，ChatGPT唔系一部冷冰冰嘅自动贩卖机，输入「可乐」就弹出一罐可乐。佢，更加似一个熟客先识得煮得啱你口味嘅OMAKASE师傅。想佢识你、明你、帮到你，唔好谂住输入指令就算，系时候正视返一个问题——ChatGPT，其实可以有灵魂，视乎你畀唔畀到空间佢「进化」成你嘅得力助手。

 

培训你自己专属嘅AI

首先要知，ChatGPT虽然背后接通咗成个云端大脑，但你用紧𠮶个帐户，其实好似一个个人化profile。你曾经问过佢咩、你讲话嘅方式、甚至你最常要求佢生成边类内容，都会喺佢记忆中种下伏线。

例如你平时成日问「请你用粤语帮我写段运动文案」、「帮我设计一个针对长者平衡力训练嘅课堂流程」，咁下次你讲「写一篇适合Facebook贴文嘅文章」，佢可能就已经自动帮你用返同一语气、同一结构、仲唔洗你开口。

系喇，AI其实记忆力好过你老板，效率高过你助理。但前提系，你要肯花时间「养成」佢。唔系「养猪」咁畀data就算，系真系要同佢对话、修正、磨合——好似拍拖咁，要互相了解，先知对方钟意边只歌，边样食物唔啱胃。

 

唔好再用「出文啦」咁简单嘅Prompt

你同ChatGPT讲「写篇文章」，就好似入餐厅话「畀个𩠌我」，然后又唔讲口味、唔讲预算、唔讲你系咪素食者——厨房点知你想食咩？然后你再闹话「点解煮牛扒？我唔食牛呀！」咁咪唔公道啰。

AI虽然可以记得你嘅「神情和语气」，但「无字暗语」，AI唔会「心中有知」，用ChatGPT生成一篇重要文章，参考三个字：游、乐、场。

游：落到游乐场，你系想玩定系做运动？主题要清晰，配合目标读者系边个？系中学生，定系隔离屋花师奶？先可以帮你篇文章定个主题

乐：你想开开心心玩乐分享，定系认认真真操嘢？语气、风格、用词清楚讲明。你想要正式学术语气？搞笑KOL文？港女风？定系林一风？

场：畀返立场入去。讲下你自己想点或者唔想点，有冇背景一定要跟、有冇立场一定要讲？

咁样讲落，好似麻烦过直接自己写？但你谂下，你用AI唔系为咗悭手工，而系悭脑工——即系帮你发掘新角度、重组思路、加速出稿，而唔系代你完稿。最重要，ChatGPT唔系你嘅copywriter，佢系你个co-pilot。

 

AI嘅灵魂，其实系你畀佢

点样令ChatGPT「有灵魂」？你要记住，AI写出嚟嘅嘢，唔系一张模仿纸，而系一面镜——反映紧你对自己作品嘅要求。

如果你每次都「一稿过」，唔修改、唔回馈、唔谂背后逻辑，咁ChatGPT永远都唔会成长。佢就会不断重复一啲你以为「ok啦」但其实唔够好嘅东西。

试下当佢系一个intern。你畀佢做嘢，做完之后你要评估、改进、畀建议：「这段太笼统了，可否举例？」、「呢句转用比喻方式啦」、「你讲『AI有灵魂』，可唔可以具体啲讲例子？」咁佢先会进步。

其实有啲人误会，以为ChatGPT要喺prompt下定生死，一句唔啱就冇得救。其实AI最叻嘅，系迭代。一次唔啱，下一次可以好啱，前提系你唔好放弃，亦唔好怕「教佢」。

 

有啲「似是而非」，系你唔小心畀佢走精面

呢个要讲个重点——ChatGPT最大嘅盲点，就系佢有时「讲得似」你要嘅，但其实唔系。

举个例，你叫佢帮你写一篇有APA引文格式嘅学术文，佢会帮你砌番个「睇落似系」论文架构，引文都好似有板有眼。但你真系去查下？有啲文献根本唔存在。有啲学者名改错，有啲期刊年份乱写。

呢啲，就好似你叫AI砌个牛扒晚餐，佢攞出嚟一块好靓嘅牛扒图画——系靓，但唔系食得。

所以，AI畀你灵感唔等于畀你最终版本。你要识得fact check、cross check、甚至反问佢：「你个资料来源系边？点解咁讲？有冇另类讲法？」

AI可以帮你开局、搭桥、补漏，但你要自己行过条桥，唔可以叫佢揹你行。

 

AI系神器，但用唔好，就变咗垃圾佬

ChatGPT就好似一把「屠龙刀」，系无敌嘅神器。但你唔识用，只系拎嚟切菜，甚至斩错人，就变咗一个危机。你如果每日叫佢「出文啦」、「帮我谂主题」、「畀几句caption」但自己唔思考、不反省、不修正——就好似绝世好剑流落猪肉档，也不过是一把猪肉刀，而国家唔会有任务比佢。

工具冇错，错系用工具嘅人。

当你用得好，佢系你职场上、创作上、学术上、教学上最得力嘅拍档；但用得懒，就变咗产量充足、灵魂空洞嘅文字机器。

 

下一步，畀个新身份佢

讲咗咁多，不如即刻做个练习：

🔧 试下为你ChatGPT设定一个角色：例如「你系我长期合作嘅内容编辑，专写贴地又具启发性嘅健身文章，读者主要系30岁以上香港人」

然后，再叫佢帮你写一篇有深度、有故事、有共鸣嘅健身文章。

你会发现，当你唔再当佢系个「打字机」，而系一个有性格、有风格、有使命嘅伙伴，出嚟嘅内容，自然有灵魂。

你养AI，AI也养你。由今日开始，唔好再讲「我唔识用ChatGPT」，因为AI好唔好用，其实好大程度，系反映紧你点样对待佢——就好似生活咁，回报永远系你投入咗几多心思。