《百元之恋》燃烧吧！废柴！

近日重睇2014年日本电影《百元之恋》（日：百円の恋），由武正晴执导。香港人对导演嘅了解应该系2019年佢执导嘅《全裸监督》，但喺小弟心目中《百元之恋》绝对系导演嘅神作。

 

故事讲述一个集loser特点于一身嘅女主角一子，具体来讲，一个不修边幅、体重过高、唔番工每日净系喺房打机、衣来张手饭来张口……但自问看透世事嘅废青。一子觉得就算努力咗都系一L样，咁不如躺平，如事者一条L样活到32岁。哩个不变嘅日常出现变化，一子妹妹离婚，同个仔返屋企住。妹妹睇唔起一子废到32岁人都要老人家照顾，一子都睇唔起妹妹做咗单亲妈妈。终于一子顶唔顺离家出走（当然出走嘅钱系老母畀嘅）。

 

一子揾咗平租房住，喺自己常去嘅「100yen店」打工养自己。对一个32岁第一次打工养家嘅人来说唔死都算系咁。当然人以群分物以类聚，「100yen店」中都揾到好多同一子一样嘅极品。其中就有两个要特别讲下，正所谓「葾猪头都有㒼鼻菩萨」，一子咁嘅package竟然有人要。第一个就系中佬同事，小蟹柳扮晒蟹，讲到自己几咁劲但都系一事无成，成日flirt一子同佢拍拖；另一个更极品，一个打拳嘅盐味大叔祐二，喺「100yen店」买过一两次香蕉就想约一子出街。心花怒放嘅一子当然应承，更有准备打扮下自己（买咗件100yen嘅豹纹内衣）。谁不知祐二想约一子嘅原因，只系因为觉得一子唔会拒绝佢，佢要得到男人嘅认同感。一子听到真相后心都碎埋，但作为废柴嘅一子又可以做啲咩。

 

人到谷底弹得几高

 

有一日祐二邀请一子去睇佢人生中最后一场拳赛，中佬同事都攞著数跟埋去。比赛中祐二输得一败涂地。打完食饭果时中佬同事一路懒风趣咁笑谈风生，仲喺一子唔在场果时讲佢坏话，想搞一子。祐二一拳打咗落中佬同事身上就走咗，中佬同事无反抗，因为唔够打。反而喺祐二走咗后，强行带一子去「开房」，仲打咗反抗嘅一子一拳。哩度系一个好靓嘅剧情转节，中佬同事忍祐二一拳，然后下一幕打返一子。一个小人物只可以揾一个更小嘅人物发泄，短短两幕表现咗一个写实又丑陋嘅人性特点。而就系果一晚，一子过咗第一次，痛苦又干涩嘅第一次。

 

同病相怜，如果你病好，只有我可怜

 

自从拳赛后，祐二无再出现，一子为咗揾佢而去咗拳馆，但就畀拳馆老师以为佢想减肥，一子亦开始咗打拳，而祐二则不停卖醉，有一日喺一子店前饮醉酒被一子带咗佢返屋企。就系喺祐二同一子同居咗一阵。期间一子日日练拳，想变好同时都想吸引到祐二。但祐二不但无为佢打气，更多嘅只有冷淡。祐二亦好快离开咗一子，因为，喺一子哩个努力嘅废柴面前，自己系一个真正嘅废柴。而离开咗后，一子同老师报名，喺32岁拳击手退役嘅岁数，打自己嘅第一场拳赛。上台介绍自己嘅时候，更播出「100yen店」嘅bgm，因为佢觉得自己人生就系值咁多。

 

原来有港版？

 

杜民泽先生执导2017年电影《空手道》，其实就系倒模自《百元之恋》，一个废青女主角被人呃感情去到谷底然后去打拳。（以下为个人见解，不喜随便插）首先以女主角来说，偶像出身嘅邓丽欣都太靓啦，相比之下安滕英演嘅废柴气场强好多，哩个可能同剧本或者演员设计小动作有关。其次，日本喺拍摄小人物故事真系世界第一。杜生当然都有投放社会议题，例如当年大妈舞攻入公园，土地问题等。但就有一种同剧情无关嘅感觉。反观《百元之恋》对社会底层人士有比较立体嘅描述，好似强奸一子嘅中佬同事，佢哋好可怜，同时又唔抵可怜。近年香港都有处理得几好嘅例子，《麦路人》中张达明因为唔可以企唔返起身立足社会，索性主动入监房。果种轻描淡写咁拍出可怜同可恨嘅一线之间，令观众同情又爱又恨嘅情节，正是社会底层故事嘅精要之处。

 

输咗唔代表白过

 

电影虽然表现得比较极端。但我哋每一个人都有好似一子咁废嘅自我低落时间。任何人包括自己都睇唔起自己，觉得人生无希望，太迟发出不如躺平就好。电影好睇在于佢好拍得好现实，喺一子准备发力时多数就成杯冷水令佢同大家冷静。我哋现实都有好多情况，明明好努力但就系无成果，最后连想去努力都好难。我哋每一个人都有一个「价值」，可以好似一子咁，觉得自己只值100yen。但无论值几多都好，废柴唔去燃，就真系等发霉嘅废柴。