可爱百变童颜美少女，既成熟又搞笑的Dee姐陈海宁
一直好想分享自己有留意既女仔，而第一个要讲既人，对我嚟讲实在争扎在好耐，最后我决定咗，写一个我系佢好细个已经见过佢既明星光彩既女仔，Isabella 陈海宁。
话说系好耐好耐以前，有一个叫天比高既地方，入边出咗好多好多叻人，而当日我又唔知点解咁好彩有幸入咗去一阵。虽然我系入边活动既日子同时间都好短，但系有一件事我永远不能忘怀，亦可能系我人生入边仅有既好运之一，就系遇到尚未出道既陈海宁。
当时有一个小组活动同佢一组，系小组入边听佢分享，讲嘢个种有文有路既程度，绝对系媲美大部份既大学生，而当时既佢，只系著住一套中学校服，放咗学之后山长水远咁走到入天水围，为既就系为咗去参与一个关于梦想，而实际上无人知系会做乜同做到啲乜既活动。
除咗能言善辨，佢亦都系一个好有主见既领导人。
话说有幸地我同佢既另一个共通点，系都钟意卓韵芝。而咁啱，当年就系卓韵芝离开商台既一年。作为粉丝，都希望抽到时间可以去商台送别呢位一代传奇既DJ，而当日系FACEBOOK都未有既年代，陈海宁竟然组织到一个粉丝既送别会。
当日佢准备得非常好，有一份礼物，系好大既心意版，仲准备埋即影即有相机帮大家各自同卓韵芝合照。而当时既佢尽心尽力，基本上系不求回报咁帮紧一班佢都唔识既人，而且成件事仲要系非常有条理，有文有路。
留意返，当日既佢，系一个中学生，一个十三四岁既中学生。
自从个次之后，我以为我一世都唔会再见到佢。虽然话，一个靓女唔一定要做幕前，但系一个同自己无乜关系既靓女唔再做幕前，又点可以再KEEP住见到佢呢？
直到后来，佢又开始出现返系大众面前。
2018年，佢唔止未红，直头称得上系无乜人识。当时呢篇访问，睇返转头，你会发现，佢真系无乜变。而对我嚟讲，我认识佢既时候，系2008年，即系话，时隔十年后，我终于再见返一个我觉得好值得出现系幕前既女仔出现返。
但系，2018年同2008年比，实在有差天共地既分别。楼，更贵，入行，看似更易，变咗竞争更大，要留系演艺圈，就似乎变得更难。但系陈海宁无放弃，终于，直到一个MV既出现，我就觉得佢离红既日子应该要不远矣。
一直以嚟，我认我单纯，我只系觉得佢系一个好可爱同笑得好靓既小妹妹，仲要十年前后几乎无变过既千年童颜，我谂某程度上都系对演艺事业既一个障碍。
但系，呢个MV既演技，就完全系演技爆发，将佢少女既羞涩同成熟既无奈一次过系短短四分几钟既MV爆哂出嚟。当时我甚至有一刻系谂，系边个女演员咁似陈海宁？点解会可以做得咁好。
无，我无睇错，佢真系陈海宁。个一刻唔知点解觉得好感动，但又同时带点无奈，因为我系谂，一个咁既女仔点解会唔红？
直到2020同2021年，系全世界都面对最艰难既日子，佢终于等到一个机会，令大家都认识到佢。随著「Dee姐」呢个称呼，忽然之间人气大增，越嚟越多节目，越嚟越多广告，越嚟越多代言，都见到呢个好可爱既小妹妹既影子。
呢个唔系单纯既幸运，系坚持唔放弃，再加上努力既学习，配合一种注定系受人欢迎既个性，终于令佢可以有今日既成绩。更甚至系，我觉得今日既成绩，先算还佢一个公道。
写咁多嘢，我都只系想讲，其实，佢除咗搞笑，除咗靓，仲系一个好有实力，同好有潜质既演员同艺员。
P.S.: 想当年佢既自我介绍系咁架：「大家好，我系Isabella 陈海宁，今年十三岁。」好似选美咁既开场白，而佢，真系美。
陈海宁（Isabella, Dee姐）
