讲饮讲食 传统系边个定

友人「果间上海舖系上海人开，一定有保证。」

本人「咁香港人开嘅茶餐厅，一定间间都好食？」

前几日同友人见到新店开张嘅简单对白，引发我写下文讲饮讲食，更进一步思考，所谓流行文化，又系边个令其流行？

谁说Pizza加菠萝有罪

先讲一讲传统Pizza。面粉，必然要用”tipo 00”；面团，含水量只可以有60%-65%；番茄酱，只可以加水同盐先可以特显蕃茄甜美；厚度，中心位置不能大于0.3cm；时间，只可以焗60-90秒……种种传统定义下先会有一个，底有碳烧纹理，外酥内湿嘅正宗传统拿坡里Pizza。

但事实上，以上严格制作嘅Pizza，唔，系，传，统，Pizza。应该系话，以上准则系由「拿坡里真正薄饼协会」（Associazione Verace Pizza Napoletana）定立，而哩个一协会系1984年成立嘅，咁1984年前，系咪冇所谓「传统」Pizza？番茄都系18世纪先入菜，想食最传统Pizza系咪应该食Focaccia（无芝士无表面酱汁嘅意大利油面包）。

三文鱼有虫唔食得

再讲讲香港人好钟意嘅寿司。曾经有著名人物甚至日本人指出日本人唔食三文鱼刺身，引来部分文化爱好者跟风。食物安全上，三文鱼的确不应生食，因为三文鱼会喺淡水生殖产卵，而淡水鱼因寄生虫关系不宜生食。然而，日本街头甚至香港食店食到嘅三文鱼，大多数来自挪威，一个幼鱼活于淡水，成长后于咸水监察养殖嘅鱼。早于本世纪打入传统文化深厚嘅日本市场。

以讹传讹

以上两个都系传统嘅传统例子，食物成为软文化输出到外地，当地人理当会成为陈述者，但传输传输，以讹传讹定必有误差，加上世俗文化随时改变，可能因为产业变化、天然资源、流行文化而有所不同。正如外地人来香旅游，饮奶茶会去兰芳园，食烧味会去一乐烧鹅，但香港人就未必食过甚至冇兴趣去试。

以至近期有日本团体喺香港跳「科目三」，正正是外地人睇香港文化嘅误差。我哋去旅行时唔会深入了解当地文化，又或者自以为了解而出现误差，最后闹成笑话。但相信大家都有外游时被用普通话打招呼嘅经验，可能唔啱听，但人哋外游时我哋都冇了解佢哋，佢哋，都冇必要为我哋了解中港矛盾等等嘅社会历史问题。

了解文化 更重要了解自己

上年同屋企人去日本池袋，因为老豆钟意乌冬特登揾一间手打乌冬专门店比佢一尝嗞味。日本手打乌冬有一手制嘅粗糙感，加上优质面粉，愈咬愈有风味。但系喺两老眼中，乌冬手指咁粗，更系中间未熟透Al dente口感，时夕冬天，汤头温度好快降到室温，未能浸软粗厚嘅乌冬，当然唔太享受食哩碗乌冬。

传统乌冬有咬口，但老人家爱食软乌冬。咁系店家错还是老人家错，定打和super。文化系相对客观睇，较多数人会更做嘅事，但唔代表主观感受有错。从根本睇，其实流行文化本身没有谁对谁错。然而，大家好想知谁对谁错，大家都好钟意分高下。

就好似每年都会有甚么甚么颁奖典礼，去定义那年边一个系最佳歌手演员，边套电影边首金最成功。但其实就系一场又一场「比面派对」。哩个方向睇，举办活动嘅单位金主，代表何谓「流行」。同时有人觉得，一人一票比fans人数对乐坛影坛比较好，但其实都系斗钱多斗人多，最后都系财团控制人民喜好。

吓，大台又唔得，一人一票又唔得，啫系点啊？问得好，冇人话过要攞奖先系好㖞。

回到文首，食Pizza要有协会证明，咁冇证明唔代表唔好食；食寿司安唔安全唔系人讲就信，可以了解文化有冇改变；大家睇一套戏听一首歌，唔系因为有咩奖，有边个听过睇过。我哋唔需要别人去证明自己喜好，我钟意系因为我自己选择，独立思考，正正系哩个年代最需要嘅特质之一，因为我哋正处于一个资讯过多，知识太小嘅年代。了解自己，先可以知道自己真正钟意嘅，才能建立自己品味。