健康无价 之 食错麦

成日都谂有咩topic啱喺专栏分享，作为slasher嘅后生仔又唔系几好喺大家面前讲职场tips，不如讲下我另一个兴趣，饮饮食食。煮饭都可算系我人生一大兴趣，一星期可能都有煮三晚（slasher好处可以多啲时间打理身体）。但煮左几年，都会开始研究下营养问题。

大家可能都知美国人身型几咁有福气，肥胖人口高达50%。可能大家会有刻板印象，觉得佢哋野食大份食得多所以肥，当然系一大原因，但有冇谂过系因为平时嘅主粮出现问题。今日就讲一讲佢哋嘅主粮--小麦。

小麦系世界三大谷物之一，系世界播种面积最大嘅作物，唔只欧美地区，甚至食米为主中国近年都开始多人转食小麦。原因无他，一个字，平。相比有一定天气要求嘅大米，小麦容易种植，加上上世纪基因改造嘅出现，小麦产量相比古代提高六至八倍。但问题正正出现喺基因改造上。

基因改造科学怪「麦」

天然植物会吸收大地营养，抵御天气天灾虫祸，一定时间先会有得收成。然而改造小麦系唔会有时间去吸收营养，加上人工方法去抵御以上问题，大量使用农药除草剂，食落肚唔知会点呢？

上世纪基因杂交技术出现，令小麦变成科学怪人，现今小麦同天然小麦基因上可以有几百至几千条基因唔同。当然有人会话「基因改造增加生产效率，有咩唔好」。系嘅，喂饱更多人，但喂病咗好多人。

觉得唔够科学？深入分析小麦营养。改造小麦比天然小麦有更多嘅麸质（Gluten），中国人所讲嘅面筋，系一种蛋白质，用作提供面包嘅咬口。可能大家都会听过麸质敏感，就系身体觉得哩啲蛋白质系敌人，产生过敏反应。当然，有麸质敏感嘅人唔多，但系唔系代表冇问题呢？

愈食愈无营养

2015年意大利医生Dr. Alessio Fasano公开有关人体肠道同小麦麸质研究，小麦嘅麦醇溶蛋白 (Gliadin) 会令肠道渗透性增加，即是大家都听过嘅肠漏。简单啲讲，细胞本身系一个接一接，环环紧扣，但肠漏嘅出现，细胞之间会出现空隙，而令有啲唔应该吸收嘅物质或者未消化好嘅食物进入身体，例如细菌、农药、重金属等等一听就知会出事嘅物质。而重点系天然小麦系唔会令人肠漏。

人类肠道系一个十分重要嘅器官，中学生物堂教我地「小肠吸营养，大肠吸水」，但营养同水其实都会由小肠吸收。咁大肠呢，唔通好似「食神」讲装屎？no no no，大肠最大嘅作用系装「菌」。大肠菌群多多少少有一百兆只，同人体有共生关系。例如，胃消化不能嘅纤维，肠菌就会帮我哋分解，再比番微量元素人体，例如维他命K。

而大肠菌群，系需要三代先改变到。而改造小麦只出现几十年，即系话世界上大部分人嘅人体根本未习惯食改造小麦。我哋先做一个总结，小麦会令小肠肠漏，吸收一啲有害物质；大肠菌又帮群又帮唔到手处理。长期食用会令身体发炎，增加患糖尿病等疾病嘅风险。

麦麦食 食上瘾

好多朋友食完面包会有一种好精神嘅感觉。因为麸质会被身体分解成一种「多呔」，即是「外啡肽」（Exorphin），系会依符喺大脑嘅吗啡受体（morphinereceptor）。太多用词好难明？人类食鸦片类药物就会依符喺吗啡受体上，引致人上瘾。

加上简单讲番人话，小麦淀粉系超级碳水化合物，A型支链淀粉。即是食完血糖会急速上升，仲会令人好快饿，食欲唔会消减。基本上食两块全麦面包同饮一罐可乐系一样咁肥，如果以咁样嘅比喻下。大家计吓自己一日饮左几多罐可乐？

最后，哩半年不停研究营养。可能我讲嘅野同大家嘅常识有出入，有错欢迎讨论同指证。所谓人无事先做到世一，新一年都想祝大家身体健康。
 

参考

《小麦完全真相》

Hollon, J., Puppa, E. L., Greenwald, B., Goldberg, E., Guerrerio, A., & Fasano, A. (2015) Effect of gliadin on permeability of intestinal biopsy explants from celiac disease patients and patients with non-celiac gluten sensitivity. Nutrients, 7(3), 1565–1576. https://doi.org/10.3390/nu7031565