【室内设计】增加家居精致感的3个小技巧

好多人喺重新装修嘅时候，定咗家居风格之后，都谂唔到屋企嘅细节位要点做。究竟点样设计，先可以令整体嘅精致感加分呢？又或者可以点做，先可以令整体更加设计感？今次就教大家几个小技巧，可以令成间屋望落去更加好睇，亦都更加精致啦！

(1) 运用特色墙设计

特色墙系近年香港装修嘅流行元素，因为特色墙可以提升家居风格，点亮整体设计。无论系客厅、睡房、甚至系走廊，都可以加入特色墙设计。所以如果想翻新屋企嘅时候，都可以尝试一下运用唔同材质，营造唔同风格嘅特色墙。而且呢个亦都系一个比较悭钱嘅做法，去令到成间屋更加有特色。

但系特色墙嘅款式众多，究竟边一款先最适合你？近年香港好流行用艺术漆特色墙，因为款式比较多，亦都可以增加质感。油起上嚟有少少工业风感觉，令人觉得家居更为型格。如果屋企风格较为简单典雅，就可以尝试使用云石纹路嘅特色墙，因为表面光滑，颜色上主要以淡色为主，咁可以增加奢华感，令家居设计不失气派。

（2）使用趟门或隐藏门

因为香港唔少单位都比较细，所以门身嘅选择就更为重要。好多人喺设计嘅时候，都会将一啲门改为趟门设计，咁就可以悭返个开门位。而且唔少嘅趟门都极为有风格，例如上方加入金属设计，就可以有一种工业味道。如果系加入日式和纸设计，就有一种和风无印感觉。所以大家可以视乎自己室内嘅感觉，拣选合适嘅趟门。而隐藏门即系将门身设计融入单位设计当中，例如有人会将书房门变成书柜，又或者可以融入收纳柜当中，就可以令设计更统一。

（3）向上向下发展 增加收纳空间 

如果你系好钟意买嘢嘅人，或者系好钟意收藏唔同物品，屋企嘅收纳空间就要做得更好，咁先可以避免单位令人感觉压迫。而且香港实在太多细单位，唔系好知道点做收纳空间，啲嘢摆埋摆埋就会拎到屋企好乱，无咗个设计感。所以大家喺装修屋企嘅时候，可以尝试向上或者向下发展收纳空间。

如果楼底比较高，可以尝试做阁楼，或者订做入墙柜。将平时少用嘅物品放上去，就可以令屋企更为整洁。如果楼底唔太高嘅话，都可以订做地台。而家香港都十分之流行地台设计，因为有少少日式感觉之余，又可以增加到室内嘅收纳空间。无论系客厅定睡房，呢个设计都好受欢迎，而且地台设计令人有一种休闲感觉，返到屋企休息都更加舒适。