【求职陷阱经历 】打字赚钱？在家工作？月入过万不是梦？

后生仔女揾工途径多人人都知，劳工处同政府都有讲见到「唔洗学历同经验，人工高福利多」嘅招聘广告就要小心系求职陷阱，但系屋企用手机同电脑打字就赚到钱你地又听过未？

老老实实，系咪呃人我就真系唔知，净系知道一般要比200蚊左右，我个阵听到要交钱即闪。而加上IG search兼职就会见到大把打字赚钱嘅招聘信息，我就试过问其中两个，开头都话免会费唔洗比钱，要你比钱嘅都系呃人乜乜乜，但到最后搞左一大轮，讲黎讲去咪又系要我比200蚊，话要做工作证，大家心照啦。

详细讲一讲我个阵嘅遭遇：

1.上IG，我话有兴趣做打字员

2.对方话随时随地工作，中意做就做，做几多赚几多，一千字两百蚊，又话佢地同好多大型小说网站同手写作家长期合作，问你明唔明

3.我ok，对方再讲帮手send宣传信息去10个group就可以入职

4.帮佢地宣传完就话转介我去一位「老师」度train，转用line倾

5.「老师」要我个人信息

6.「老师」话要先交200蚊做工作证，以防打字员走佬同竞争对手捣乱，唔信就删唔洗多讲

明晒啦，即删。我冇实质证据证明佢地系咪呃人，但大陆同台湾已经有唔少呢类骗局，google search都search到。

只能讲我遇到呢个团队好有组织同系统，用一大堆字同转介令你觉得佢地唔系呃人，佢地仲话大陆、马来西亚同香港等等地方都有人做紧，讲到规模劲大。

最后奉劝各位后生仔女，揾工都系踏踏实实出去揾或者系可靠嘅求职平台揾啦，记得要search下间公司信息睇下信唔信得过啊！

作者：阿怡，一个90后嘅冇志青年。

本文为HKESE 自由作家原创编撰，如欲转载请联系我们。