Slashie 人生，你准备好未？

开始咗Slashie嘅生活方式一年半有多，唔短又唔长，喺呢到写个简单回顾，如果你打紧工有少少想做「斜杠青年」但又未开始，可以埋嚟睇下！如果你都系Slashie，欢迎揾我倾吓计！

少少背景介绍，我叫Kyle，90年出世，已经系3字头（90后已经30岁，我都仲未接受到……），香港土生土长，屋邨长大，出生平平无奇，读书唔叻（会考12分，冇错，系最后几年中五会考生），中六中七去遵理读（其实教得几好），大学读OU，冇试过外国留学，比较幸运嘅系屋企人工作稳定，出嚟做嘢之前都生活平稳，唔驶忧柴忧米。
从2012年大学毕业开始计，一直打工都差唔多7年，际遇都算唔错，由工厦小公司跳到尖沙咀、中环写字楼跨国公司，后来有缘转到去一间Startup，又有机会转到腾讯，系香港以外嘅地方返工。事业发展都算几顺利。

但喺28到29岁嘅关口我开始谂，如果未来三四十年都系咁，我接唔接受到？第时会唔会后悔？

回想过去几年嘅职业生涯，最长个份工都系两年半（系一份我觉得好好做嘅工，冇压力又几自由，公司好多人做超过十年），其实我都系坐唔定嘅人，转嚟转去都好难揾到一份工觉得可以做到退休，自己少少进取但又钟意试新嘢，系一间公司打工可能真系唔系我想要嘅生活。
谂住一排，觉得自己最想系财务自由，靠被动收入过活，唔系为咗无忧无虑咁吃喝玩乐，而系想唔为揾钱而投入大部分时间心机，想有时间同条件慢慢谂人生有咩值得做、值得追求，系香港呢个地方想解决「住」呢样基本需要都已经好难，想达到呢个状态其实都好难。但当一个人一直打工揾钱，其实好难有心机谂自己呢一世人有咩想做。不过可惜唔系富二代，系短时间内都冇条件咁做。

然后我就退而求其次，谂有冇机会先「工作自由」，对我黎讲工作自由系工作上有得拣做定唔做，做嘢唔受地方限制，而又揾到唔差过全职工作嘅钱。

由2019年7月离开腾讯开始计到依家一年半有多，都算几好彩，依家基本上系超预期达到我期望嘅状态，平均月入5-7万港币，工作地点自由（系亚洲会好啲），唔系做保险，唔驶sell嘢亦唔驶跑数，冇咩压力，但有时要赶deadline，工作量有时都大。下一篇（如果有时间写…）就讲吓我点样由做一份全职工去到依家嘅状态，希望令更多人知道其实除咗打一份工都有其他出路。