不如用广东话写返篇文呀？

继上次𠮶篇广东歌既文章之后谂谂下不如试吓用广东话写返篇文呀！由细到大返学上堂老师都系会教用我地用书面语作文，呢排发现其实香港人用嘅中文真系几特别，有分书面语同口语，虽然英文都有啲好似slang咁嘅嘢，但我哋学嘅中文嘅书面语同口语用法都几大分别。要睇一个人好唔好文采都系会书面语就断定，识中文嘅人又未必会识写口语，大部份都系香港人，广东人或者马来西亚人会识，希望可以做少少野，令呢个咁独特嘅语言文化唔会比笼统嘅中文（书面语）取代。

记得以前许冠杰年代，有好多粤语歌会用到广东话即系上述所讲嘅口语黎填词，譬如「我哋呢班打工仔⋯」「学生哥好温书啰⋯」「半斤八両做到只积咁嘅样⋯」。然后到90年代，都会有几首类似嘅作品，好似Twins嘅「你讲你爱我」李彩华嘅「你唔爱我啦」等等。呢啲琅琅上口嘅歌曲同歌词真系令人非常怀念，唔只够地道，又容易记。但系近年来好似已经越黎越少听到用广东话作词嘅歌曲，可能因为听落比较通俗，市场唔大，所以都系会写返书面语嘅词。但其实，我认为广东歌唔只系代表用中文做一首歌咁简单，佢亦都系一个语言文化，所以用广东话去作一首广东歌，反而更加能凸显出广东歌嘅特色同味道，而且更能够令其他人了解真正嘅广东话。

如果你同我系差唔多年代，一定会经历过ICQ同MSN，当年好兴其中一种火星文。唔知大家会唔会仲记得类似咁嘅嘢呢？「艾笠U」「典解牙」「禾刀吾g牙」虽然唔知点解当年要咁样打字，但而家谂返转头唔只会觉得回忆满满，仲觉得真系好特别同有趣，原来广东话可以咁样演变。然后到而家我哋会打啲咁嘅嘢「nei jo gen mei ah」「sek ng sek fan」好似真系只有香港人会睇得明自己人讲紧啲乜嘢。虽然唔系话要宣扬呢啲火星文xD，但系觉得有必要令到广东话呢一个特色嘅语言文化比更多人知道。

真系因为近年社会咁多动荡同变化，先会发现自己一路拥有嘅嘢系几珍贵同特别，去到唔同嘅地方先会明白原来有好多人都会钟意讲广东话同想学广东话。用口语写文章系咪就会显得冇咁好文彩呢？应该只系因为我哋由细到大对作文呢一个概念都系围绕喺书面语度。其实无论系讲也好，写也好，广东话一个比较特别嘅语言。识得听广东话嘅人都唔一定会识得睇广东话。譬如话「喺」「嘅」「啲」「左」呢啲字眼就算识得讲但都会有好多人唔识得睇，而且我哋用呢啲字嘅时候亦都会有唔同嘅写法，好似「喺」呢个字，有啲人会用「系」有啲会用「系」，对广东话冇咁熟悉嘅人一定会好混乱。

谂一谂就连Apple嘅Siri都会同我哋讲广东话，我哋又点可以辜负外国人对广东话嘅重视呢？有时候用书面语同台湾嘅朋友沟通得多都会时唔时有一两个生字唔记得咗广东话系点讲，又或者有啲字已经被广泛地取代，如果我哋唔经常讲又或者用呢啲字，真系就会消失㗎啦！仲有我哋非常特别嘅广东话揭后语「阿茂整饼 - 冇果样整果样」，记得当年返学𠮶时仲要背同默书添！如果有机会就再同大家分享咁特别嘅揭后语啦！

好多嘢都系香港独有嘅文化，而呢啲文化就只能靠我哋去延续落去，广东话只系其中一样。如果不甘被同化就要俾更多人认识我哋独有一面。呢两年听得最多嘅一句说话好似系「今时唔同往日」，但就算系咁，我一啲都唔希望呢种独特嘅文化会被任何野取代。珍惜拥有嘅同时，都希望可以同更多人分享我哋嘅文化！