职场防疫 ，防疫职场

社会运动未解决之际，出现了2019冠状病毒，对所有人影响更加大，当中对于有部份打工仔由农历新年开始已经WFH (Work From Home)同疯狂揾口罩延伸到宜家已经发生中被清假，放无薪假，遣散同裁员情况。除非政府继续推出保就业，如果唔系相信今年年尾到下年头就会知道真实劳动市场情况。

本身要继续返工嘅打工仔最担心当然系感染肺炎，但宜家更加担心自己会唔会系其一个被裁员名单之内，尤其每一日返工知道公司无咩生意又见到管理层不断开会要大家谂多啲方法，同事之间会慢慢感受到公司下一步会想做啲咩。

其实职场防疫唔只保障员工身心健康，同时防疫被出卖，好多所谓因素决定边个员工可以留低或者离开，喺宜家嘅环境人性真伪会表露无违，变相自保而去挑选本身唔太讨好或者有竞争力员工，当然决定权喺管理层身上，而点去选择个名单好大路去考虑包括过往工作表现，薪金水平，家庭状况，同事关系，或者最直接就系部门仲有无价值运作落去。

唔惊讶裁员潮会继续出现包括更多公司倒闭，租金系一个好严重嘅成本问题，但从来因为香港喺自由市场定律，无人会解决依个根本问题，导致大大小小企业喺疫情爆发后要进行一大轮嘅重整政策，或者马后炮讲法之前赚咁多，宜家大半年就出现危机，可以想像到企业营运资本有几健全（或者啲钱去晒边到？）

姑勿论自己会唔会遇到被裁，作为打工仔要时常好好装备自己，尤其要管理好自己心态，从来无人会知道下一秒发生咩事，唔会所有事都会顺应自己谂法而行，追求安稳都要好好懂得迎接转变。

最后都想讲一句公道说话，无生意无钱赚，出唔到粮，交唔到租，所以最后一步决定遣散同裁员，只要跟足法例去补偿就可以，期望打工仔都要理解依一点。

职场不只防疫，同时不断装备。