星期五的烏雞

11月13號係黑色星期五，每次到呢啲日子我都叫自己唔好記住，因為我平時已經係滷水雞，但係到呢啲日子直頭變左烏雞，真係唔到我唔信…   到底邊個發明黑色星期五嘅呢？我懷疑呢個係咀咒…嗚嗚   行到巴士站，架車想開走，勁跑100米，終於追到，車尾…   「唔緊要，搭小巴轉地鐵囉…」   去到東鐵站，突然有廣播「因為有動物闖入路軌，列車將稍為延誤，敬請原諒…」   成日話有動物闖入，究竟係咩呢？想搭火車但冇買飛既人？   「等多一陣啫，唔緊要，行快兩步咪得囉…」   仲要轉多次小巴先到公司，一路急步一路食餅當早餐，成日咁樣食早餐，會唔會盲腸炎架？   咬第一啖，塊餅“淋”晒，唔食得喇…明明未到期架，激氣…   「算啦…當減肥…」   愈心急愈冇車，等左半個鐘先上到，真係…隔離又坐左個講電話超大聲既阿叔，瞓著都俾佢嚇醒…   「唔瞓會精神啲嘅…」   一返到公司就俾人圍，問我點解鎖櫃桶，搞到佢地攞唔到野，仲問我有咩擺喺入面，點解要鎖？   個櫃桶係俾我擺野架嘛…你理得我鎖唔鎖啫？我擺咩關你咩事呢？做咩要攞我D野呢？    佢地仲問「條鎖匙你攞走埋呀？」，梗係啦…如果唔係鎖黎做咩呀？咁白痴既問題都問…   「算…唔好嬲，我晏就放假架喇…放鬆放鬆…」   朝頭早通常都比較靜，我仲諗可以輕輕鬆鬆到1點鐘。   因為晏就請左假去睇醫生。點知啲野多到離譜，都唔知係咪有心玩野…   「一定趕得切既，一定得既…」   以為可以食個飯，點知都係唔夠時間，買左份三文治頂住先…   一打開，未食就有隻蚊同我爭，諗住撥開佢，一撥成份三文治就跌左落地下…   到頭來都喺要餓住個肚，喺醫院…等   「唔緊要，睇完可以食架喇…」   睇完，諗住去個洗手間，點知一、二、三樓一齊洗緊廁所，呢間咩醫院黎架？   「唔緊要，過兩條街有商場，到商場先去啦…」   5分鐘之後，排到我喇…點知一掛個袋上去，個鈎連埋個袋就“拍”一聲咁跌落黎，我個袋呀…   「唔緊要，唔緊要…返去洗啦…無事嘅…」   跟住，拉褲鏈既時候，一拉個扣就斷左，我要強調呢條褲係新架…   「算啦…好彩唔係成條拉鏈爛，都拉到嘅…」   今日咁黑，一定要食返餐好既補數，有間門面幾靚既餐廳，以為有餐安樂茶飯食…   “格”蛋殼…我都估到架喇…次次食蛋都食到蛋殼，但係我偏唔信邪，點知又中…   「唔緊要，證明隻蛋係真嘅…」   終於…返到屋企喇…沖個涼，洗晒D黑氣就冇事架喇…   點知…冇晒梘液呀…   「呢樣…好緊要呀…天呀…點解咁對我呀…想沖個涼啫…嗚嗚…」   烏雞的故事繼續…