做Slash/Freelancer = 冇前途？他们值得更多尊重和鼓励！

好多时听啲Slash或者做唔同Freelance嘅朋友，向我大吐苦水，话屋企人经常畀说话自己听，例如「好心就正正经经揾份长工做啦」、「百足咁多爪，你做得边样？」、「收入又唔稳定，炒埋都未够一碟」之类极mean嘅说话。

其实，做得Freelance，系咪真系将收入摆喺第一位？要揾钱，相信离唔开金融行业。地产、保险、银行呢啲咁揾得，其他行业系咪冇存在价值？

我觉得，睇唔起做Freelance或者Slash嘅人，对佢哋存在太多误解。做Freelance嘅人，所负责嘅嘢随时比打长工嘅仲要多，例如你做Sales，你每日都系执吓货，揾吓客，做Closing，最多做埋收银等等，但Freelancer日常已经要装备自己，十八般武艺样样要识，平日唔帮自己增值，点样有工作机会？

其次，边个话Freelance揾唔到食？我公司有Freelance，做紧几份工，就系唔钟意斋打死一份，日日朝九晚六坐喺度扮工，加埋加埋收入比我呢份长工仲要多！只要本身有料，自己Deal每单Job个价钱可以几何级数咁跳！

尤其依加武汉肺炎肆虐，大把公司要Cut Cost要炒人要放No Pay Leave，做Slash当然工作机会少咗，但本身打开几份嘅佢哋，就好有效咁分散风险，起码唔会冇工返或者被炒鱿，呢个环境你以为冇得做，实际上仲稳阵过长工。我真心觉得身边做Freelance嘅朋友，个个乐观唔计较，而且好肯尝试唔同嘅Job，几乎有Job都会接，试问喺香港金钱挂帅嘅城市，有几多呢类人？

同埋，千其唔好觉得做Slash唔正经，依加好多人仲行紧旧时𠮶套，以为返写字楼工比较优越，西装骨骨先叫正经，No No No！Slash唔系话做就做，本身要对自己好有信心，觉得自己喺唔同环境底下，都能够适应唔同嘅要求，咁先系一个成功嘅Slash同Freelance。Come on！依加已经系廿一世纪，思想系时候要与时并进，做多两份Freelance嘅付出，绝对不下于一份所谓朝九晚六嘅长工，赚嘅钱亦唔一定比中环班西装友少。最重要系，Freelance好有可能过得比返长工嘅人开心同满足。

所以，我觉得做紧Freelance同Slash嘅朋友仔，真系值得更多尊重同鼓励。