雲妮變強妮（二）：點為之攻擊？攻擊有乜用？
上回講到，雲妮係街比人車咗一巴之後變咗黑面，啊唔係，係眼前一黑之後就入咗醫院。係佢留院期間，佢發𡚒圖強，覺得點都要搵樣功夫學下，就算唔可以保家衛國，都可以自衛防身。但係，武術類型多如恆河沙數，先唔以武術種類去諗，究竟一巴車埋嚟點解會搵？有乜功夫可以一巴車返暈人地，又可以防止比人車巴暈呢？
以武術嚟講，攻擊既終極目的，就係令目標失去行為能力，咩叫失去行為能力呢？最極端嚟講就係死亡。事實上，攻擊本身既意義，來自於心理學上「戰或逃」既反應，如果決定咗一戰，就當然至死方休（不論對手定自己）。根據心理學大師佛洛伊德既簡單分析，人生在世，不外乎「追求生命」同「逃避死亡」。如果要令身體產生要同人決戰既心理狀態，的確「唔係你死就係我亡」。
咁講法係咪好殘忍，係架，事實上，打仗都係咁。打仗，戰爭，即係國家同國家之間既打交，一個國家攻擊另一個國家，另一個國家又反擊咁，咁為咗乜？咪一樣想對方「失去行為能力」，無辦法再做某一啲動作（例如反抗）。所以，武術既終極目標的確係由此所產生。
不過，同樣道理，由於打仗實在太殘酷，所以國與國之間盡可能都唔想開戰。人類當然一樣，追求和平既心態，都係為咗唔想不斷你打我我打你咁，好彩既可能一個贏就一個輸，但更多情況都係兩敗俱傷。只不過，想還想我都好想好似中咗頭獎，有嘢唔使做老闆又吹我唔脹。要維護和平，並唔係單靠有夥熱愛和平既心就可以做到，武裝自己，先有方法達到和平。
正如網絡流傳一句名言，「學拳就係為咗令人同你講道理」，遇上蠻不講理既人，其中一個原因就係佢覺得自己真係好好打，有乜唔對路就出手打到你認同佢為止。但當人地知道出手係打你唔贏，就會開始同你講道理。
所以，實際上既武力，就係起碼要有令人唔敢攻擊你既實力。又或者係，當人地攻擊你既同時，佢就會遇上更可怕既攻擊，咁人地就會唔敢亂出手。
「咁究竟攻擊嚟講又有咩分類呢？」雲妮拎住個枕頭左拋右拋咁自言自語「其實都唔係下下都要打人吖，當人係魚咁撻來撻去都係一種攻擊啫？」
無錯，上次都有提過，攻擊方法主要有三種，分別係「站立技」、「地板技」同「摔撻技」。咁究竟呢三種技術係點變樣令人失去行為能力呢？咁就要用另一種分類法，分別為「打擊技」、「關節技」同「絞技」啦。
「打擊技」
顧名思意，真係打落去，一種直接攻擊。點解打擊技會有效呢，主要因為兩種原因：
一）腦震盪：腦係負責維持身體運作既重要器官，當腦部受到巨大外人撞擊時，就會令腦部受損，咁就會直接影響中擊者既行為能力。另一方面，頭部受到外力衝擊時，亦有可能令負持維持身體平衡既系統無法運作，為咗「保護」受擊者，個腦就會短暫「熄機」，以令受擊者唔好再行動而產生傷害；
二）內出血：要維持身體運作，除咗個腦要清醒工作，仲要靠身體循環以令身體唔同部位、器官、肢體可以獲得營養同能量繼續工作。內出血雖然睇唔到，但事實上就係係身體入邊破壞咗個循環系統，繼而令各個器官無辦法再運作落去，亦會引致死亡。
但係咪每一下打擊都要做到上述效果先至有效呢？又唔啱，因為身體有保護機制，當佢收到既「刺激」，例如撞親，比人打，或者跌咗落地下，其實都會令身體產生警號。其中一種警號就係「痛感」，「痛感」既產生就係提醒身體使用者本人，痛既位置有受傷既風險，唔好再比人整親啦。而如果所承受既「刺激」可能已經直頭令相關位置嚴重受傷，無辦法再運作，咁就會產生「劇痛」，「劇痛」會強烈阻止身體使用者唔好再活動，以免承受更大既傷害，係呢種情況下，就係透過令攻擊目標產生「痛感」而促使佢「失去或放棄行為能力」，咁就係攻擊既目標啦。
點解會話「痛感」只係一種「訊號」呢？因為呢種感覺，係可以克服既。例如有啲人完全無被撞擊過，身體唔知咁既情況會唔會受傷，所以會變得好敏感，輕輕撞到都會好痛；但同樣既力撞落一個打開拳既人身上，就未必會痛。力度無變既情況下，點解一個痛，一個唔痛？原因就係另一個人既身體已經適應咗，呢種刺激唔會構成傷害，所以就唔需要發出「痛感」呢種訊號去提醒個身體使用者。
亦因為咁，「抗打」練習就係為咗令身體可以承受呢種「刺激」，減弱「痛感」既敏感性，咁就實現真正既「唔怕痛」啦。
另一種情況，都係透過打擊技而令人失去活動能力，就係透過打擊，擊中身體既神經系統，導致身體接受一種強制放鬆既身體訊號。例如攻擊肝臟為例，因為肝臟被大量神經線包圍，但外邊又無足夠既肌肉骨骼同脂肪去保護，所以當肝臟受到攻擊或者撞擊，都會誘發神經系統產生一種放鬆既訊號，令身體唔好再活動。
「關節技」
當你明白打擊技會產生「痛感」令對方失去行為能力，而關節技基本上係一模一樣既原理，只係針對既目標唔同，係關節。
關節，即係骨同骨既連接。要知道，身體需要產生動作，除咗肌肉發力之外，骨頭都係重要負責輸送力量既部份。正如槓桿原理一樣，如果有力，但支槓桿本身受唔到力，力量都好難傳到目標。如果骨同骨之間失去連接，咁就無辦法再正常發力。
關節技既目標，就係係解剖學上真正令關節「失去活動能力」，透過令關節無辦法正常活動，從而達至令目標「失去行為能力」。舉例，一隻手要摺埋，肘關節就必需要正常運作。如果透過關節技令肘關節移位，咁就幾乎等同廢咗一隻手。
亦都因為身體內裏知道呢個問題，所以當針對關節施力時，身體會更易產生痛感，係練習情況下，被施力者會「投降」以希望對方唔好再用力扭斷自己既手手腳腳，咁先可以保住活動能力。
令一方面，關節技亦都係係實質意義上既「控制對方」。因為當掌握咗關節既原理，就算唔令關節移位，亦可以令對方無辦法發力，甚至透過關節本身既連接，反向用力，令對方全身被控制，繼至出現倒地，或者無法用力反擊既情況。一般所謂既「擒拿術」，或者日本既「合氣道」，都係擅長呢種類型既關節技。
「絞技」
絞技既原理同技術，相對於關節技有異曲同工之妙。「關節技」針對關節，「絞技」就針對頸部位置。主要目標就係透過緊鎖頸部位置既氣管或者血管，令攻擊目標無法呼吸或者身體無法供血到腦部。身體又會因為保護機制，會盡快停止運作，以避免腦部會因為唔夠血用而無法工作。
身體之所以要有呢啲保護機制，主要就係為咗確保身體唔好再受傷，同埋係資源有限既情況下（例如血同氧氣），盡量可以節省消耗，所以會令身體陷入「昏迷」，以令個身體盡可能保住最低最必須既工作能力。
「咁計法，係咪應該先由唔怕比人打學起呢？」雲妮望住果個比佢催殘完既枕頭，諗諗下，其實佢咪同個枕頭一樣不堪一擊？咁計法，學乜都無用啦。
呢個時候，雲妮發現門口有好多奇異既眼光望住佢，似乎都係以為佢痴咗線。
雲妮忽然覺得塊面有啲熱熱地，轉過身望返住窗邊。到底，點先唔怕比人打呢？
