【澳洲旅行】維多利亞省大洋路一日遊

提到澳洲,通常都會諗起悉尼、墨爾本等等既大城市,但其實除左遊覽城市之外,澳洲既自然景色亦係澳洲旅行既一大重點。而澳洲其中一個熱門自然觀光勝地就係位於維多利亞省既大洋路。本人最近就係墨爾本參加左一個去大洋路既tour,所以想同大家分享下我既經驗。

分享之前,簡單介紹下大洋路呢個地方先。其實大洋路係澳洲南邊既一條綿延約400公里既沿海公路,因為沿途可以見到一望無際既海景、沙灘、奇岩怪石等等而聞名。呢條公路距離墨爾本市中心大約90分鐘車程,所以如果要去既話就要自己揸車又或者好似我咁報local tour. 報團可以經網上又或者經當地旅行社,價錢大概100蚊澳幣(500幾蚊港紙),亦有D旅行社可以再平D。

我當日既行程係九點鐘係墨爾本市中心集合,參加人數大概十人左右。人齊之後就上左一架van仔,然後司機兼導遊就開始講解行程同埋向大洋路出發。司機係一個好風趣同盡責既人,沿途不時同我地傾計同介紹當地歷史故事,所以旅途上都學到D野。

經過個幾鐘車程,終於到左大洋路附近,司機仲特登係加油站停低比我地買下野食同去下廁所,小休之後再繼續出發。再坐多一陣車,終於到左大洋路既入口(Memorial Arch),附近有一個紀念第一次世界大戰士兵回國既雕像,同埋一個好多人影相既海灘。老實講,睇既野其實唔多,但司機都好盡責咁介紹。之後架車就沿住大洋路而行,途中亦有影相位比我地落車,但主要睇既都係海同沙灘,差別只係在於係唔同既位置同角度睇。

旅程既高潮算係之後去到既Kennett River,一個可以比你睇到野生鸚鵡同樹熊既地方。司機仲預備左雀粟比我地餵雀,而且提醒我地果度既鸚鵡有兩種,一種係紅綠色既parrot, 另一種係白色有冠既cockatoo,前者比較溫馴但後者就有少少攻擊性會啄人。紅綠色既更加完全唔驚人,見到你有野食會主動停係你手或膊頭(又或者頭上),遊客都餵得好開心。可惜既係當日既樹熊得一隻,而且停左係好高既樹上面,基本上只可以影完相望兩望就算。Kennett River附近仲有一間小cafe,所以午餐就係果度食埋,食下意粉、炸魚薯條之類。

之後既行程其實同上晝差唔多,都你沿大洋路行,係唔同既地方影差唔多既風景。當中比較值得一提既係Loch Ard Gorge海灘同埋附近既十二門徒石(12 Apostles)。前者係一個自然形成既封閉式海灘,而後者係大洋路最出名,最多人睇,豎立係海邊既多塊巨石,係大洋路既必到景點。睇完呢個景點之後,旅程亦算結束,大家上車回程到市中心。當晚返到市中心時間大約九點,計返整個行程用左足足十二個鐘。

整體黎講,其實旅程都算幾有趣,因為可以見到好多平時係城市見唔到既景色。但可惜我自問唔係一個非常熱愛大自然既人,好多景色對我而言都比較重複,再加上車程,有時都覺得幾悶下。不過如果你黎到墨爾本,我都係會推介既,因為始終係熱門景點。但如果你同我一樣唔算係大自然愛好者,又唔係好多時間既話,我諗就要考慮下啦。

#澳洲, 旅遊遊記, Local tour