MIRROR

利申我唔喺鏡粉，12個成員我只認得幾個，反而Error 得4個，而且位位辨識度高，容易認。

 

任何潮流都喺一個循環，今日興嘅聽日就過晒氣，以為舊嘢原來某日又興番，道理一字咁淺。

 

我細個時興許冠傑，廣東歌熱由此而起，我小學教中文個老師狠批Sam Hui歌詞口語化，唔合所謂書面語規則，我當時心諗你識條鐵咩，日日返屋企聽住錄音帶背歌詞。唔夠幾年，潮流已經喺一片東洋風，時下興嘅喺譚詠麟張國榮梅艷芳，跟手張學友同呂方一出道就可以去紅館開演唱會，而阿爸仲話張國榮唱歌咬字唔正，阿哥已經狂loop 哥哥嘅不覊的風，雙親仲聽緊鄧麗君青山姚蘇蓉。

 

四大天王時代我已經開始少聽歌，識得最多嘅都只喺張學友嘅歌，黎明識十首八首，郭富城再少啲，劉華只喺識我恨我痴心同獨自去偷歡，但我唔會話唔知佢哋喺邊個囉。

 

之後冒起嘅陳奕迅容祖兒紅透半邊天，Twins 更加喺奇葩，不過除咗單春子，其他人嘅歌我都唔識，但唔會覺得佢地有咩問題，從來百花齊放喺好事，有自由選擇自己鍾意嘅，而唔去批鬥另一啲先喺良性現象。而我阿媽仍然鍾情鄧麗君，一啲問題都冇。