文化唔系奢侈品，但…

最近睇到一部关于健身室嘅韩国连续剧，忽然个人有点感触。一个好有心兼有料嘅教练，就算教嘅嘢几好几有人钟意，都徘徊著系执笠边缘。

讲起香港嘅创作，你谂起啲咩？

系咪以为做创作人＝搞吓画展、写吓诗、开Patreon收下粉丝钱、喺IG出靓相、接下sponsor，然后去咖啡店打卡、生活chill爆？

唔好意思，现实系：好多创作人已经系社会嘅最底层——甚至跌落地心。

「创作」系咩？唔系娱乐，而系社会肌肉

你谂吓，一个社会冇创作，会变成点？

就好似一个人冇肌肉——睇落冇病，但郁两郁就攰，跌低一次要三日先爬得返起身。

文化肌肉都一样。平日你未必察觉佢存在，但喺你迷失、焦虑、想揾返自己嘅时候，你就会明白，原来你一直靠住啲诗、啲歌、啲文、啲画——去撑住你个人精神唔爆煲。

但喺香港，呢班「维他命C」级嘅创作人，却日日要为生存打仗。

内容免费文化，造就「睇到饱，冇人养」嘅怪现象

你会发现，香港人对内容有极高标准，但同时极低付出。

要靓图，要深入分析，要爆like金句，要有社会意识，但又唔想畀钱；

写得好？「你应该多啲曝光」；

写得差？「唔洗理佢啦唔识写」；

揾人打赏？「呃钱」；

揾企业合作？「出卖灵魂」；

靠自己搞创作品牌？「冇出路啦，返去打份工好过啦。」

香港创作圈，好似一个开咗健身房但冇收月费，连健身器材都系创作人自己搬入嚟——你嚟练得开心，但佢日做夜做唔够钱交电费。

文化输出困难，人才流失系真

你睇吓台湾，有文化部、文策院、补助金、内容节目export平台；
韩国有文化立国，CJ ENM、Netflix Original节目自家监制；
中国有短视频平台几十亿播放量，一句话变现五百万。

香港呢？创作人上IG tag亲「sponsor」就被人话「做KOL咁cheap」；讲少少社会议题又话你「讲政治唔专业」；你出书冇人买，开展览要自资，开Patreon又俾人话：「咁都要钱？」

所以香港创作者就好似同香港嘅职业运动员有啲相似，一年四季为咗比赛练习、教练费自己比再做埋教练个份、支援少、自己操自己、自己拍片、自己剪、自己sell。

读者话：「我支持创作呀！」但冇人留低

最戆居系，香港人唔系冇文化欣赏力，系冇被教育过「要点样养一个创作人」。

佢哋好真心留言：「你篇文好感动，哭咗。」

但下一秒就碌走咗

「打赏？下次先啦」

「睇完无聊吓姐，唔洗真系畀钱嘅」。

呢种心态，就好似你上完跆拳道堂，仲同教练讲：「你啲教得好好呀！学到好多嘢！下次我带埋朋友再嚟玩！」，下次真系有再嚟，但学费从来都无交过。

如果你以为我讲故仔，其实我本人其实遇唔少呢啲情况。唔少学生同你讲穷，但转个头食餐饭贵过个堂学费，而教练本人就系度食风。

教练有屋企要交租，创作人都有脑要食饭——讲真，「赞好」系精神支持，「打赏」先系营养补给。

咁点解唔放弃？

间唔中会问自己——写嚟做咩？又唔系养到自己。

但我真系停唔低。

其实理由好低能，因为我真系好钟意写文。

我由中学开始创作网络小说，到后来因为创作小说而有第一份兼职揾上门。但我钟意写文唔系因为有钱收，而系唔写硬系觉得人生差啲嘢。

但我都系人，就算未称得上丰衣足食，但都想可以食饭可以随便叫冻饮。

创作系免费？

如果你睇到呢度，系咪谂讲到尾我都系想叫你磅水？
但我其实想问：你想唔想香港未来仲有人继续创作？

我认识嘅创作人其实都无乜要求，真系有小小鼓励，可能够佢烧多一年，讲足一世。

其实唔使你出一份粮比人，由你可以由今日开始，睇到觉得一篇文令你值得思考有得著嘅文章，唔一定要多，一杯咖啡、一个菠萝油嘅价钱，已经足够令每一位创作人写多一篇、挨多过一日。