新年运动身体好！冻冻天气做运动要小心唔好冷亲啊！

新年紧系由做运动开始！但系近日天气转冻，系咪就唔可以再做运动？唔系！天气寒冷不及人懒！只要你唔懒！再冷都唔系理由令你拒绝运动！但当然，系天寒地冻既日子，做运动当然由做好热身开始！

要好好咁做运动，当然要做好热身，特别系天气冻既日子，你个人既身心状态都系处于保暖多过郁既倾向。所以，系天气冻既时候更加要注意做好热身，但系好既热身应该要点做，又应该包含啲乜呢？

首先，你要确定一下你做既运动系啲乜先。不论用眼睇定用脑谂，你都要比自己心理状态知道，嚟紧即将做运动，又即将会做啲乜嘢运动。当中包括你会做乜嘢既动作？需要用几大幅度既去郁？有啲乜嘢特别既突发情况你要准备埋？由心理状态开始令自己有一个感觉去做好运动，咁你就已经做好咗热身既第一步。

其次，如果你已经知道即将会做既运动系点，就直接开始啦！不过唔系一嚟就由最高强度去做，你可以将嚟紧既动作由慢至快，由易至难咁慢慢逐步做上去。跑步既可以跑慢啲，深蹲可以慢慢深，但要蹲深啲。令自己既身体可以随时准备去做唔同角度既动作，咁你就自然可以令嚟紧要郁既身体部位都感受到准备要投入工作啦。

但系热身点先叫做热得好呢？书本教既，就话要令个人体内温度提升，血管扩张，但我好地地点知道自己系咪已经达到适当水平？所以最直接既方法，就系尝试做一啲嚟紧就要做既动作，特别系一啲突如其来既高强度动作，例如一啲急停，转向，又或者H.I.I.T.既频率先做几下，令自己感受一下系咪真系做得到先。如果呢个时候已经喘气，咁就证明个热身未够啦。

要令计划成功，一个好既开头至关重要，所以要令自己新一年既运动计划做得好，就一定要由好既热身开始做起啦！