内容创作新时代：AI文案 vs 人类风格，谁胜出？ | Owen＠taekwondowen

你有冇试过咁嘅场景——打开社交媒体，一篇篇标题劲吸睛嘅贴文跳晒出嚟：「3秒教你变有钱」、「99%人都做错呢件事」、「呢个秘密医生唔会话你知…」

你明知可能系clickbait，但又忍唔住click入去。睇完，觉得劲顺、劲流畅、劲合理——但一分钟后，内容讲咗啲乜你又唔记得。

呢啲，就系典型AI生成嘅文案：高效、吸睛、极速产出，但…你会记得佢，定系记得你朋友𠮶句「我真系撑唔住啦，好想辞职」？

呢篇文，我哋就嚟讲清楚，AI文案同人手文案嘅分别，唔系「边个写得靓啲」，而系你想触动边个，打动边个，留下咩印象。

AI文案：数据导向嘅内容魔术师

AI写文，劲在乜？系可以喺零感情嘅情况下，精准命中你嘅情绪按钮。

佢识得分析网络大数据、学习用户行为、掌握SEO关键字，知道边啲字眼会吸引你停低，边啲语气会令人share得多，边啲格式可以令内容「睇落好专业」。

例如：

「5个你一定要知道的减肥技巧」

「2025年最值得投资的10种副业」

「懒人必备：30分钟搞掂一周餐单」

呢啲文案写法几乎无懈可击，靓到连你阿妈都忍唔住Like。AI用嘅字眼经过无数测试，比好多行销copywriter都熟悉「转化率」同「点击量」个秘密。

但问题系——感觉好似有啲空。好睇，好读，好平滑，但冇火，冇刺，冇咁容易入心。睇完成篇文，可能净系记得个标题，但内容又系千篇一律，无乜特色同记忆点。

相比之下，人写嘅文案，唔一定流畅。可能语法有错、句子唔够精炼、成段跳来跳去，但你会感觉到：有个人喺背后。

一篇好嘅人手文案，就好似你同老友喺茶记叹奶茶时听到对方倾诉——真、肉酸、有时自打嘴巴，但就系咁样先打动人。

佢可能会咁写：

「我唔系专家，但呢几年真系挨得辛苦。每日写文、剪片、揾客，一边惊AI会取代我，一边又要用AI帮我做埋啲我唔识做嘅嘢。你话系咪好矛盾？」

呢段，冇乜SEO，冇乜「最佳标题」，甚至连「Call to Action」都冇。但读落，你可能会想like，甚至想覆一句：「我都系咁谂。」

SEO嘅世界，好似一场永无止境嘅升级游戏。你要识：

关键字布局

meta描述

标题优化

internal linking

readability score

AI喺呢方面几乎系战神级别，但人手文案要兼顾呢啲，往往会令风格受限。为咗令Google读得明，往往写到自己都唔想读。

咁即系点？放弃SEO？唔系。

最理想嘅做法系：AI做助手，人做作者。
你可以用AI帮你搞keyword排位、重写句子、计分数，但最尾果份情感、幽默、真诚、故事性，系你比落去，唔系机器。

有人话，AI会取代文案人。
我话，AI只会取代唔愿进步嘅人。

写文依家唔系「你vs AI」，系「你同AI点样拍住上」。
AI帮你打底、做结构、揾素材，然后由你出手加情感、添共鸣、放自己经历落去。

你睇前IKEA香港小编就知啦——唔止写post，系写气氛，系打入香港人情绪共鸣最底层。佢哋出嘅文案，你可以话系抽水，但抽水之余都要有共呜你先知佢抽紧乜水。你以为其他品牌小编唔识写文咩？识架，个个都有文案训练。但唔系个个都有「sense」。

𠮶种sense系咩？系当全港喺讲某样嘢嘅时候，你可以喺同一节奏底下，加自己tone落去；系懂得讲人哋未讲出声，但心入面想讲嘅嘢。呢种直觉，系AI无论睇几多数据都练唔到返嚟嘅。

未来最好嘅文案，应该系：

用AI嘅效率、速度、优化能力

加上人嘅情感、诚意、记忆力

再渗入独有嘅风格同真实经历

你可以话AI系一个超强助手，帮你打开大门，但真正走入人心、搅动情绪果一刀，仍然要靠你自己。

试下揾一篇你最近用AI生成嘅内容，拎返出嚟，唔改格式，只加情感。
讲下点解你写呢篇文、你自己点谂、你经历过乜。你会发现，AI打草稿，你做灵魂，先系最强嘅组合。

本文由作者【Owen＠taekwondowen】创作刊登于HKESE，如未经授权不得转载。