避开3个新手学跆拳道会踩中嘅地雷，就已经赢过99%得把口想学嘅人。

第一次学跆拳道，你以为自己系武侠片入面嘅龙套，但好快你就会发现，呢场戏根本唔系打人，而系打自己嘅心魔——懒、怕、谂多咗。

今日唔讲跆拳道历史，唔讲凌空转身720度落地转身，我只想讲三样成日见人踩、仲踩到瘀晒嘅「新手地雷」，如果你仲未中，恭喜你；如果你已经踩中，唔紧要，我哋一齐反省完，继续行。

第一雷：「练得唔够好，我唔够资格去比赛」

有学生学跆拳道半年，就有教练问：「你报唔报下个月个色带赛呀？唔使怕，分龄分带。」

好快就答：「我未准备好。」
结果下年后再叫报名，都系答：「我未准备好。」
再过一年，都系：「我未准备好。」

原来，「未准备好」唔系一个状态，系一种 心态。
你唔报比赛，唔系因为唔够料，而系因为你怕输，怕失败，怕自己唔够完美。

但当你见到一个黄带小朋友打完一场比赛，笑到成块面红晒，一个叔叔都敢落场打——原来真正嘅学习，唔系等到「准备好」先开始，而系踏出一步，你先会慢慢准备得好。

反思：
错唔系报比赛报太早，而系你咁耐都仲以为要完美先可以开始。

第二雷：「点解练极都无进步？」

有好多学生会问，基本踢脚，转唔顺、唔高、冇力。日日练、堂堂练，但踢落去仲系似摆pose多过打人。

系咪天生冇踢脚天份，系咪唔啱学跆拳道？

但当你试下影低自己踢脚影片，返去睇。你可能会发现，原来好多嘢，教练一路提住一路讲，你以为自己听咗但系无改到，「哦」完就继续练。
就好似你炒饭唔开火，净系系度拌……炒到几时熟啊大佬？

重点唔系你练咗几耐，而系你练咗啱唔啱。练得多唔系真系会变完美，用错嘅方法踢多一亿次都系错。

如果你净系靠「努力」，但唔肯面对自己出错嘅技术细节，你只系喺错误入面重复练习，练出嘅系坏习惯，唔系进步。

反思：
一味「用力」但唔用「脑」，最终你练出嘅，唔系进步，而系一个精神内伤版嘅自己。

第三雷：「我仲未减肥，等瘦啲先考试／比赛啦」

呢句我听得多到可以出T恤印花：「等我瘦啲先……」

点解我咁熟？因为我一个学生都讲几十次。

然后转过头，果个话「等我瘦咗先做」嘅人，系IG贴相自己食紧乜嘢好西。
瘦系唔会等你嘅，因为你冇踏出第一步。

同一个学生，终于发现自己有问题，想认真练，头几堂喘气喘过柴油发电机，但几个月后，唔止落咗磅，仲学识咗原来 「身体唔完美」唔代表「唔配拥有进步」。

反思：
唔好用「我唔够好」做借口，其实你系怕自己「努力咗都唔得」，所以干脆唔开始。

你踩中边个地雷？

学跆拳道其实就好似学人生咁——你一定会中招，但中咗唔代表要投降，反而系你醒返一场仗点打。

唔少人都曾经想过放弃、怀疑自己、觉得「我唔系练跆拳道嘅人」，但而家回头望，全部都只系过程，坚持到落去嘅人就系带住黑带嘅师兄师姐。

所以，如果你系新手，记住一句：

「你会唔完美，但你绝对值得开始。」

即刻实践一件事：

揾个信得过嘅师兄或教练，影低你一段练习片，再一齐慢慢分析，唔好再盲目乱踢。

唔系话你一定会即刻升带、即刻变高手，但至少你唔会喺自己幻想入面打十年空拳。

而你，只要避开以上三个地雷，就已经赢过99%得把口想学嘅人。