用AI做文书，唔代表你冇创意——真正冇创意嘅，系你对创意嘅定义

你以为ChatGPT帮你写Proposal就唔算创作？你错得好彻底。

帮你写Email、撰文案、改报告格式，你讲得出，AI几乎都做到。而你呢？坐喺度开始质疑人生——「我咁样算唔算抄功课？」

但讲真，有冇人话你用Google揾资料就等于冇脑？

以前我哋查字典仲要逐页翻，宜家你打个“define serendipity”即刻有答案，咁你又冇话Google系作弊工具。点解一讲AI，你就开始心虚，好似用咗就冇灵魂咁？

其实，用AI唔系偷懒，反而系你终于开始用脑。

真正嘅创作，唔系你想像中咁辛苦

喺香港，创意经常被误会。大家以为要够「原创」、要「白纸黑字自己砌出嚟」、最好仲要爆肝挨夜开通顶咁呕心沥血做出嚟——咁先算系真创作。

如果创意只系靠咁嘅熬夜灵感，「凌晨三点听见海哭的声音，突然灵光一闪写出嚟。」，咁我不如转行做庙祝等神明降笔啦。

咁样搞落去，咪又系日日OT写唔完报告、谂唔出IG caption，仲以为自己系内容创作者。实情系，内容系有，但创意？唔好呃自己。

其实大部分人所谓嘅「创作」，不过系喺资讯过剩之下打紧自己脑汁。你以为你系创作者，实际上你系内容农场搬运工，勉强堆砌出一篇Post，心谂：「都唔错啦。」但其实你写完都唔记得自己讲过乜。

Sorry，咁样唔系创意，系苦力。

真正嘅创意系咩？

唔系闭门造车，而系擅用资源，以最短时间，讲到最强讯息。

呢句听落好似project briefing，但佢系真。创作唔系灵光一闪，而系一种选择——你选择点样拆解问题、重组资讯、传递讯息。

创意从来唔系孤独嘅产物，而系一场合奏。你有冇试过用AI写五个唔同版本嘅开场白，然后拎嚟A/B test？你有冇试过叫AI帮你将繁琐嘅内容转成表格、或写成一篇中学生都睇得明嘅讲稿？

你有冇试过叫AI帮你模拟客户口吻再回复电邮？或者写一封拒绝客户又唔失礼嘅信，唔使每次都用「多谢你宝贵嘅意见，我哋会考虑」咁敷衍。

呢啲唔系懒，系进化。
系你开始识得用工具，解放创作肌肉，而唔系只靠死撑。

三招见效，用AI帮你重塑内容

想做出有「你味道」嘅内容？唔使死撑硬写晒全部，亦唔需要叫AI帮你写哂全部。AI唔系代替你，而系加乘你。

AI出草稿，你再入灵魂
无论系文案、简报、企划书，先叫AI起稿，你再落调味，改tone，补细节，变成自己风格。当然，调转都无问题，你写草稿，揾AI同你校对延展，补充你想要嘅文章，修改你嘅文笔错别字，一样都系帮你悭返唔少时间。

将AI当第二人格
好似打拳咁，佢出一招，你反一招。唔啱唔紧要，佢唔嬲你。你可以狂试无限个方向，唔会有PM闹你话你改太多次，亦唔使拎feedback返去再闹自己「点解我唔早啲谂到」。

用AI做你创意节奏嘅节拍器
写唔到时，先唔好揾灵感，揾Prompt先，谂下大方向，或者求其一啲关键字，转去揾啱指令，等AI帮你起步，落笔就快好多。好似以前band房练鼓咁，冇节拍器你成日拖拍，AI就系你写作嘅节奏师傅。

换言之，你唔系唔creative，系你从来冇人教你点样同AI夹Band。

AI唔系敌人，可能系你最忠诚嘅拍档

你以为AI最终会取代创作人？我同你讲，会被取代嘅，唔系唔creative嘅人，而系唔愿变嘅人。

试谂吓，旧时印刷都系手动排版，而家连报纸编辑都用AI预测标题点样多click。肯试、肯用、肯错、肯改，先系未来最抢手𠮶班。

AI唔系写手。AI系你副手。你负责谂tone、定方向、决战高峰。副手就帮你撑场、铺路、防失误。

你以为你请咗个写手，其实系你请咗个AI军师。

以前你一份Proposal改十次，改到怀疑人生；而家AI帮你生成三个Version，你拣一个，再按个「延展」掣，煮个杯面返嚟已经有稿喺度。咁你话系懒，定系高效？

创作唔再系「爆肝」，而系「揾人帮你代肝」

喺一个OT变成常态、KPI当饭食嘅城市，创作人经常冇得休息。你每日食麦皮时谂brief、等红绿灯时改captions，连去厕所都忍唔住谂文章flow。

但依家，AI可以帮你减压，唔系取代你个脑，而系帮你争返时间。

冇错，AI唔会帮你爱人、唔会替你悲伤，但佢可以帮你写封解释自己点解迟交嘅Email，文情并茂，冇错字，仲可以啱格式。

即刻试以下Prompt👇

「请帮我用幽默口吻写一篇IG post，主题系『下雨日唔想返工』，再建议三个tag同一个吸睛开场白。」

你会发现，用得其所，AI唔系代替你，而系帮你走得更远。

最后送你一句：

创意唔系比人赞你写得几好，而系你敢唔敢写出你嘅声音。AI可以帮你揾声，你要负责讲出个tone。

唔好再话AI冇灵魂，其实一直冇灵魂嘅——可能系你自己。但好消息系，唔迟，只要你愿意，今日起你可以重新揾返创意。用AI唔系作弊，而系终于攞返时间，做一个真正有创意嘅人。