食极都唔瘦，可能系你啲粒线体罢工 | Owen＠taekwondowen

你有冇试过——早餐净系食只水煮蛋加杯黑咖啡，午餐搞个沙律唔落酱，晚餐甚至只系啜几啖白粥，然后仲话自己「食好清呀」。但一个星期后，上磅——+0.5kg。

嗱，唔好话你冇努力。你又节食、又做运动，连夜晚煲剧都会夹住做平板支撑。咁点解成个人都瘦唔落？系你身体坏咗？定系脂肪黐住你唔肯走？

或者...你身体入面𠮶班叫「粒线体」嘅工人，已经集体罢工。

粒线体系咩？为咩瘦身会同佢哋有关？

粒线体（Mitochondria）唔系咩魔法配件，其实系每个细胞入面帮你「制造能量」嘅小工厂。你食入肚嘅糖、脂肪、蛋白质，最后都要经过粒线体处理，转化成你郁手郁脚、开口讲嘢、甚至心脏跳动所需嘅能量。

所以当你粒线体状态唔好，就算你食得几干净、操得几勤力，都好似换唔嚟一副有力又清爽嘅身体。更惨系，佢哋仲会叫你脂肪「留低唔好走」，因为冇足够能量系统可以烧走佢哋。

你可能已经中晒以下伏：

成日攰，训极都唔醒神；

成日无胃口，但一食又易胀、易肥；

运动做极无进展，甚至比上次仲差；

明明食少咗，磅数依然高踞不下。

呢啲其实都唔系意志力问题，而系你身体入面啲工厂停咗工，甚至拆咗机。

粒线体其实好现实，你点对佢，佢就点对你。

当你长期食太少，身体以为「粮食短缺」，会自动转入节能模式。此时粒线体会减慢运作，甚至直接「熄机」，脂肪燃烧率自然低。持续摄取过低热量会影响新陈代谢与粒线体功能。

粒线体最钟意身体活动，特别系阻力训练。举哑铃、深蹲、俯卧撑，全部都系佢最爱。阻力训练可以显著刺激粒线体生物生成，即系令你体内多咗啲粒线体工人嚟帮手。另外，如果你想你嘅粒线体运作得更好，带氧运动可以令你嘅粒线体更加活跃，更快消耗脂肪作为能量应用。

你日日挨夜加上高压生活，唔止精神差，粒线体都会俾氧化压力炸亲，睡眠不足会削弱粒线体DNA修复能力，令其功能退化，长远引致疲劳同脂肪堆积。放松心情，做运动都可以令你减低压力同提升睡眠质素。

粒线体好似部复杂嘅机器，佢需要好多「零件」先郁得顺。其中包括维他命B群（B2、B3、B5）、镁、铁、CoQ10（辅酶Q10）等，全部都系帮助粒线体产能同抗氧化嘅关键角色。少咗任何一样，粒线体效率即刻插水。

唔系再清肠、再断食，反而系「畀返尊严」畀你身体入面啲工人。

唔系叫你放肆大食，而系确保每一餐都有足够蛋白质、健康脂肪，加埋少量复合性淀粉质（例如糙米、蕃薯），比粒线体有燃料入厂。

建议试试一日三餐都包括以下元素：

高蛋白质：鸡蛋、豆腐、鸡胸；

健康脂肪：牛油果、橄榄油；

天然淀粉质：蕃薯、糙米、藜麦。

唔需要操爆，只要进行有规律、有节奏嘅大肌群训练（例如深蹲、硬举、伏地挺身），已经可以叫醒粒线体，提升脂肪代谢效率。

建议保持固定训觉时间，减少蓝光刺激，并营造黑暗宁静环境。你每晚训觉，粒线体就会启动维修功能，日间自然有力气，夜晚都唔易暴食。

可以先由食物入手，再按需要补充营养补充品。不过建议揾注册营养师或医生评估身体状况先至补充，唔好乱咁食。

真正持久有效嘅减重，从来唔系靠节食，而系靠恢复身体机能。粒线体健康咗，新陈代谢会自然提升，脂肪就会喺唔经意之间慢慢走。

所以，唔好再怀疑自己「冇用」，你可能只系一直用错方法。你需要做嘅唔系「减」，而系「修复」。

唔好再话「我今日食得太多」，而系问：「我啲粒线体够唔够燃料运作？」今日开始，一餐有蛋白、有淀粉、有健康脂肪，你会发现自己唔止瘦得健康，连个人精神都唔同晒。

如果你真系唔知点开始，不如话我知你平时点食，做开啲乜嘢运动，我帮你调返啲「燃料表」。你身体好咗，世界都会好似易咗啲。