食極都唔瘦，可能係你啲粒線體罷工 | Owen＠taekwondowen

你有冇試過——早餐淨係食隻水煮蛋加杯黑咖啡，午餐搞個沙律唔落醬，晚餐甚至只係啜幾啖白粥，然後仲話自己「食好清呀」。但一個星期後，上磅——+0.5kg。

嗱，唔好話你冇努力。你又節食、又做運動，連夜晚煲劇都會夾住做平板支撐。咁點解成個人都瘦唔落？係你身體壞咗？定係脂肪黐住你唔肯走？

或者...你身體入面嗰班叫「粒線體」嘅工人，已經集體罷工。

粒線體係咩？為咩瘦身會同佢哋有關？

粒線體（Mitochondria）唔係咩魔法配件，其實係每個細胞入面幫你「製造能量」嘅小工廠。你食入肚嘅糖、脂肪、蛋白質，最後都要經過粒線體處理，轉化成你郁手郁腳、開口講嘢、甚至心臟跳動所需嘅能量。

所以當你粒線體狀態唔好，就算你食得幾乾淨、操得幾勤力，都好似換唔嚟一副有力又清爽嘅身體。更慘係，佢哋仲會叫你脂肪「留低唔好走」，因為冇足夠能量系統可以燒走佢哋。

你可能已經中晒以下伏：

成日攰，訓極都唔醒神；

成日無胃口，但一食又易脹、易肥；

運動做極無進展，甚至比上次仲差；

明明食少咗，磅數依然高踞不下。

呢啲其實都唔係意志力問題，而係你身體入面啲工廠停咗工，甚至拆咗機。

粒線體其實好現實，你點對佢，佢就點對你。

當你長期食太少，身體以為「糧食短缺」，會自動轉入節能模式。此時粒線體會減慢運作，甚至直接「熄機」，脂肪燃燒率自然低。持續攝取過低熱量會影響新陳代謝與粒線體功能。

粒線體最鍾意身體活動，特別係阻力訓練。舉啞鈴、深蹲、俯卧撐，全部都係佢最愛。阻力訓練可以顯著刺激粒線體生物生成，即係令你體內多咗啲粒線體工人嚟幫手。另外，如果你想你嘅粒線體運作得更好，帶氧運動可以令你嘅粒線體更加活躍，更快消耗脂肪作為能量應用。

你日日捱夜加上高壓生活，唔止精神差，粒線體都會俾氧化壓力炸親，睡眠不足會削弱粒線體DNA修復能力，令其功能退化，長遠引致疲勞同脂肪堆積。放鬆心情，做運動都可以令你減低壓力同提升睡眠質素。

粒線體好似部複雜嘅機器，佢需要好多「零件」先郁得順。其中包括維他命B群（B2、B3、B5）、鎂、鐵、CoQ10（輔酶Q10）等，全部都係幫助粒線體產能同抗氧化嘅關鍵角色。少咗任何一樣，粒線體效率即刻插水。

唔係再清腸、再斷食，反而係「畀返尊嚴」畀你身體入面啲工人。

唔係叫你放肆大食，而係確保每一餐都有足夠蛋白質、健康脂肪，加埋少量複合性澱粉質（例如糙米、蕃薯），比粒線體有燃料入廠。

建議試試一日三餐都包括以下元素：

高蛋白質：雞蛋、豆腐、雞胸；

健康脂肪：牛油果、橄欖油；

天然澱粉質：蕃薯、糙米、藜麥。

唔需要操爆，只要進行有規律、有節奏嘅大肌群訓練（例如深蹲、硬舉、伏地挺身），已經可以叫醒粒線體，提升脂肪代謝效率。

建議保持固定訓覺時間，減少藍光刺激，並營造黑暗寧靜環境。你每晚訓覺，粒線體就會啟動維修功能，日間自然有力氣，夜晚都唔易暴食。

可以先由食物入手，再按需要補充營養補充品。不過建議搵註冊營養師或醫生評估身體狀況先至補充，唔好亂咁食。

真正持久有效嘅減重，從來唔係靠節食，而係靠恢復身體機能。粒線體健康咗，新陳代謝會自然提升，脂肪就會喺唔經意之間慢慢走。

所以，唔好再懷疑自己「冇用」，你可能只係一直用錯方法。你需要做嘅唔係「減」，而係「修復」。

唔好再話「我今日食得太多」，而係問：「我啲粒線體夠唔夠燃料運作？」今日開始，一餐有蛋白、有澱粉、有健康脂肪，你會發現自己唔止瘦得健康，連個人精神都唔同晒。

如果你真係唔知點開始，不如話我知你平時點食，做開啲乜嘢運動，我幫你調返啲「燃料表」。你身體好咗，世界都會好似易咗啲。