《泡芙人》：点解你明明唔重，望落仲系圆碌碌？

你有冇见过啲朋友，成日讲：「我好轻呀，百零磅咋！」但望落条腰仲粗过行山杖、手臂挥落去有阵风都甩唔甩肉？呢种人我哋有个亲切又有啲无奈嘅暱称：泡芙人。

「泡芙」呢个字听落甜美又得意，但如果形容一个人身形，意思就变得有啲复杂——外表软绵绵、松松弛弛，冇乜实质线条，甚至有啲人仲会误以为自己“肥咗”。但真相可能系——你其实唔肥，只系肌肉量太少。

「点解我体重咁轻，但著衫唔Fit？」

有位朋友话，佢每日都食得好干净，冇油、冇盐、冇糖，瘦身餐配绿茶，仲会一星期做几次瑜伽，但三年过去，佢条腰唔止冇变幼，反而仲开始出现松垮嘅小肚腩，体重冇升，著泳衣𠮶下真系尴尬到想游走去深海潜水唔返嚟。

问题就系出喺一个误解：你以为「轻」就代表「瘦」。其实，脂肪比肌肉轻，但体积大得多。你身上嘅体重数字虽然冇变，但只要肌肉慢慢流失，而脂肪偷偷长返嚟，你个身形就会慢慢向泡芙靠拢。

根据美国运动医学会（ACSM）嘅资料，肌肉密度约为每公升1.06公斤，而脂肪密度只系大约0.9公斤。即系话，同样重量之下，脂肪会「膨胀」得多好多。你可以想像一下：一磅肌肉似一块实心砖，而一磅脂肪就好似一大泡棉。两样重量一样，但塞入你裤头时嘅感觉，系天与地嘅差别。

体重重＝肥？No。体重轻＝瘦？都系No！

另一个泡芙人嘅朋友，身高165cm，体重得47kg，听落简直系Model级数。但佢跑上两层楼梯已经气喘如牛，行去地铁站仲会攰到要坐低饮水。去健身室检查体脂，竟然超过30%。咁就解释晒：原来轻唔代表健康，更唔代表有线条。

反之，有啲重训开得好勤力嘅人，成日都比人话「你咪肥咗？」但一脱衫，条腹肌几条成行，结实得嚟有线条，原来佢只系肌肉多，，体重自然高啲，但外表Fit到爆。

所以我哋要打破一个迷思：体重只系数字，唔系评价你身形或健康嘅唯一标准。好多人都误以为减重就系目标，其实你真正应该追求嘅，系——你想要咩样嘅身体？

你想要嘅系体重，定身形？

好多人健身第一步就系「想减磅」。但你有冇试过问自己：其实你想要变成咩样？系线条清晰啲？定系著衫贴身啲？定系只系想喺体重机上面见到个数字细啲？

讲真，如果你净系追数字，而冇理会身体成份（Body Composition）肌肉同体脂嘅百分比，好容易跌入一个死胡同：越减越冇力、越减越虚弱，最后成个人变泡芙，内外都松晒。

记住，脂肪唔会帮你跑得快、跳得高、挨得夜、抗得疫。真正俾你能力、姿势、能量同线条嘅，系肌肉。而一个充满肌肉嘅身体，即使你体重比以前重啲，你都会望落瘦啲、结实啲、有精神啲。

肌肉不足，唔止系样衰，仲会影响你健康

「咁咪代表要增肌啰？但我唔想变大只呀！」又嚟，又系呢句。

请放心，一般人每日食得唔够蛋白质、训得唔够、多数仲训得晚，根本唔会一操就变Hulk。增肌系需要时间、训练同埋营养精准控制，唔系话练两下就会变「肌肉女」。

更重要嘅系，肌肉不足，唔止影响你身形，仲会影响健康。例如：

新陈代谢慢咗：肌肉会帮你燃烧脂肪，少咗肌肉＝少咗燃烧机器。

容易寒背、腰痛：核心冇力，身体自然摇摇欲坠。

膝头长期痛：因为大腿肌肉无力，令膝盖承压过重。

容易疲倦、精神唔集中：肌肉不足，氧气运输都慢咗。

其实由发育完成后，肌肉就会开始减少，肌肉量每年下降1%～2%，而随著年纪越大，流失量越高，越会显著增加跌倒、骨折、糖尿病与认知退化风险。但呢个问题唔只发生喺老年人，如果你长年冇郁动、成日坐著冇活动，30岁开始都可能慢慢流失肌肉。

咁，我应该点开始？

问得好。唔使即刻报健身室、唔使即刻买啲蛋白粉返屋企。第一步系：谂清楚你想要嘅身形系点样。

系想著衫修身啲？ 系想行得耐啲、唔再咁易攰？ 系想有线条，但唔想太壮？ 定系纯粹唔想再一跑步就脚软？

揾到目标之后，用训练同饮食慢慢堆返你应该有嘅肌肉，而唔系净系追个磅数。

例如：

每星期做两次以上全身训练（家居Bodyweight都得）

增加蛋白质摄取（每公斤体重约1.2～1.6克）

减少长时间坐著，30分钟起身郁下

结语｜「泡芙人」唔系天生，而系习惯造成

如果你自问系「泡芙人」，唔使内疚。你冇做错事，只系未揾啱方法。真正嘅问题唔系你磅数几多，而系你嘅身体几有力、几有用、该大就大、该幼就幼。

唔好再畀体重数字牵住你行，开始训练、增加肌肉、重塑身形，你会发现：你睇落瘦咗、Fit咗、人都精神咗，而个磅数，可能仲重咗添。

咁又点呀？你咪再唔系泡芙人啰。