你以为自己老咗，其实只系退化得快咗。

「年纪大咗，就唔应该再做太多运动啦。」
「唔好再跳啦，小心跌亲。」
「企唔稳？正常啦，老咗喇嘛。」

如果你听过以上呢啲说话，甚至自己都唔自觉咁样谂，其实你可能唔系真系老咗，只系相信咗自己应该要老。但事实系：退化唔等于衰老，而衰老亦唔等于冇得逆转。

今日要同你讲嘅，就系：你其实未老，只系退化得快咗。

老化不等于退化

想像下你部手机，两年无更新，成日跳App、卡机、电量一晚就冇晒。系咪「老咗」？未必，只系你冇俾佢好好保养。人嘅身体都一样，退化唔系因为年纪，而系长期无用、无练、无俾机会佢保持状态。

肌肉、骨质、神经反应——呢啲都系会因为唔用而加速流失。如果你一日都无郁过下肢，企唔稳其实好合理；但只要重新训练，60岁一样可以企得稳，仲可以跳得起。

根据美国运动医学会（ACSM）建议，老年人每星期应该进行至少150分钟中等强度嘅有氧运动，以及两次肌力训练，以保持功能性体能（functional fitness）。但香港呢，大多数人连郁都唔敢郁。咁，退化点会唔快？

打破宿命论：年纪唔系借口，系起点

我哋成日觉得「年纪大咗，就应该接受慢慢衰退」，好似冇得拣。但你谂真啲，咩叫做「应该」？系身体话晒事，定还是你自己放弃咗身体？

睇返现实，有唔少60岁以上长者，都因为持续训练，做到一般30几岁人做唔到嘅事。跑马拉松、做深蹲、单脚企、弹跳训练⋯⋯全部都系可能。

例如日本一项针对长者跳跃训练（plyometric training）嘅研究指出，65岁以上参与者只需进行八星期低冲击跳跃训练，其平衡能力、下肢力量及反应速度均有明显改善，跌倒风险亦明显下降。

而系笔者过去训练长者的日子期间，其实唔少长者都能够做到非常灵活同敏捷嘅动作同反应，就算做一啲中青年人睇落会觉得辛苦嘅动作，例如波比跳，深蹲跳等等，传统觉得长者会因为膝关节问题而唔应该做嘅动作嚟讲，其实一样都系做得好。不过要留意，每个人身体状况唔同，开始任何训练之前，最好先问过医生或物理治疗师，根据自己情况慢慢加强强度。

你话：「但我真系唔够力，点跳得返高？」

我话：「你冇力，先至更要跳返高。」

点解咁讲？身体系会学嘢嘅器官。只要你俾正确嘅刺激佢，就会出现适应反应——肌肉会变强，关节变灵活，神经反应快咗，反应更灵敏。再讲得简单啲，跳唔高，就练跳。企唔稳，就练企。冇力，就练返有力。

唔使玩 CrossFit，唔使举重 100kg，由低开始做起，已经足够你慢慢将身体叫醒。

一个简单入门例子（60岁以上适用）：

椅子半蹲跳：坐喺凳边，尝试唔用手起身，再慢慢站直，之后轻轻做一个小跳（脚指留喺地面，脚掌离咗地就可以），重复 10 次，感觉自己下肢发力。

单脚站立：扶住椅背，单脚站立 10 秒，每边 3 次。改善平衡力，强化脚踝。

抬膝踏步：当做行军咁抬高膝盖踏步，每次 30 秒，连续做 3 组。

如有曾跌倒、骨质疏松、心脏问题等，请先征询医疗专业意见，调整动作幅度或改用替代训练。

做得耐咗，慢慢会感觉到唔同——楼梯好行咗，等巴士企得稳，晨早起身唔再腰酸脚软。

真实例子：证明「唔老得咁快」系可能

笔者见过一位七十零岁嘅婆婆（虽然睇落唔似），初初嚟做训练时，觉得自己最多都只能急步行，唔可以跑步。佢话因为惊跌亲，唔敢郁。结果个半月左右，佢唔止识跑仲识跳添。

佢同我讲：「原来只要郁多咗，个人就会想郁多啲。觉得自己冇咁快老。」

呢句，其实你都可以讲得出口。

事实上，好多时唔系睇你郁唔郁到，系你几时由「想郁多啲」变成真系「郁多啲」。当你有呢个改变，成件事就会唔同哂。

结语：想证明自己未老？行动就系最好嘅证据

退化唔系命运，只系结果；年纪唔系障碍，只系起点。你愿意重新训练，就能够重新定义自己。唔好俾观念困住自己，畀个机会自己行多一步，跳多一下，挺直腰板再望远少少。

下一次你跳起嚟𠮶一刻，就系你同自己讲：「我仲未老。」最有力嘅证明。

如你想进一步开始「逆龄训练」之路，你每日轻松郁一郁，身体都可以重新属于你自己。

记住：你有得拣，而你仲有时间。唔好再等，由今日开始郁。