休息唔代表停低：聪明训练嘅真正起点

你系咪成日对自己讲：「唔可以停，停就会打回原形」？ 健身路上，你好可能已经唔系输喺意志，而系输喺冇俾自己复原嘅空间。

唔休息，就唔会进步。呢句说话唔系鸡汤，而系实实在在嘅科学原理。

「坚持」唔等于「日日爆操」

坚持唔系日日逼自己去gym做运动，而系每日都问清楚自己点解要训练。

你可能觉得唔操就系懒，其实真正嘅坚持，系喺需要休息嘅时候，仍然选择信任自己——相信身体知道几时要慢下来。长期过度训练会导致中枢神经疲劳、免疫力下降、甚至影响情绪稳定。真正坚持，系懂得平衡操练同复原。

我哋系训练有一样好重要嘅概念，训练唔系计一次两次，而系一个周期嘅累积。训练系训练周期嘅一部份，休息都系。

肌肉唔系练出嚟，系休息时长出嚟

当你训练时，其实系破坏紧肌肉纤维。要令佢变得更强，必须经历修复阶段。所以，唔俾身体时间修复，就算操得再狠，都只会适得其反。

曾经有一位学生跟我做运动，但有两个星期明显越做越差，我就问佢，你平时自己会做啲乜嘢？佢就话佢将我教嘅运动，每日做三次，日日做，话希望咁样会更加快有效果，但问题系，食药都唔会一次过食哂一日份量会快啲好，身体反而会适应唔到。所以千祈唔好谂住勤力就一定得，真系随时会得不偿失。

Active Recovery：复原唔代表hea住唔郁

所谓「主动式恢复（Active Recovery）」，系指以低强度活动促进血液循环、加速代谢副产品清除，例如：

慢步行、轻松踩单车

动态伸展（Dynamic Stretching）

瑜伽与深层呼吸

滚筒放松（Foam Rolling）

冷热交替水疗

休息做得好，下一次操得爆。

有时候，做长时间低心跳率嘅运动，都可以算系一种休息方法。因为休息唔单止系要令身体「受伤」嘅位置唔郁，亦都需要令新陈代谢所产生的废物带走，先至会有效令自己恢复，所以透过长时间嘅低心跳运动，有效刺激身体血液流动之余又唔会带嚟大太负担，令个人可以更加好咁恢复身体。

「操死自己」可能系种情绪逃避

问下自己，你系咪透过操练去麻醉焦虑？

唔少人透过高频训练填补内心空虚。但过度训练唔单止打击生理机能，连动力同心理状态都会崩溃。记住：训练应该系你照顾自己嘅方式，而唔系惩罚自己嘅手段。

学识「周期化训练」：进步有时，休息有序

专业运动员训练都分阶段：

基础期（Build）：提升耐力与基本力量

强化期（Peak）：挑战极限，增强表现

恢复期（Deload）：降低训练量，整合成果

呢个方法叫做周期化训练（Periodization）。聪明嘅人，系懂得几时进攻，几时撤退。肌肉、神经、情绪都要reset先会长期进步。

点样知道自己系咪真系需要休息？

以下系几个指标，帮你判断系咪应该休息：

训练后特别易攰

睡眠质素下降

长时间无法提高重量或表现

训练后情绪低落或失去动力

如果出现以上两项或以上，就系时候调整节奏。

休息，系下一次爆发前嘅蓄力

真正嘅强者，唔系日日出手，而系日日观察自己身体，了解自己状态，然后做出最有智慧嘅决定。

唔操𠮶日唔代表你放弃咗，而系你帮紧自己准备好再上多一层楼。

下一次瞓醒，个人fit过前日，咁先系你训练旅程最有力量嘅证明。