香港都做到大制作娱乐电影《九龙城寨之围城》
我其实唔太期待本片，喺未知系漫画改编电影前睇到预告就闻到好大阵伏味，后来知道咗当然都有啲改观，但正如曹刿论战「夫战，勇气也。一鼓作气，再而衰， 三而竭 。」一开始吸引唔到我，就点到无太大吸引力。但与友人去一看究竟后……
好睇！
好好睇！
好_好睇！
本文就做一个film review，观察主流正反评论后，同大家分享《九龙城寨之围城》好睇喺边，同埋啱用一个咩期待值入场，当中有咩亮眼位，又有咩沙石需要讨论。头盔要戴好，本片系娱乐片，雅俗共赏，就唔会有太多高深电影艺术，爽快感美感系重点。而网上有人觉得剧本差，都值得攞出嚟讨论讨论。
剧本系咪咁败bug
先浅谈故事。开场2-3分钟讲旧时，龙卷风（古天乐绎）廿年前统一咗龙蛇混杂嘅九龙城寨，然后直入廿年后介绍主角，偷渡佬陈洛军（林峰绎）为咗身份证打黑市拳揾钱，谁不知得罪黑道大老板（洪金宝绎）然后逃到九龙城寨，再被城寨人以为自己搞事大打出手。讲真，一开头讲故嘅情节我唔多喜欢（不过设定嘅野，点都要揾位塞，加上早啲令观众了解背景都未必系坏事）。而且陈洛军得罪大老板情节预告已经有，令我对剧情惊喜大打折扣。
但编剧细节又处理不错，片中对白精简上口自然，无言语交代漫画式嘅动作，但又睇到角色招式嘅特点，同时又出人意表。例如陈洛军打黑市拳三番四次忍痛手执玻璃碎打倒对手，睇得出其心狠手辣，同时无时无刻都为生存而拼命嘅特点；陈洛军被追杀时及时上咗巴士，当观众都为佢松一口气嘅时候，反派王九（伍允龙绎）喺旁边嘅窗外出现都系一种好好嘅处理方式。节奏快嘅电影好易落入一开打打足廿分钟嘅闷局（例如美队3机场果幕），哩种快中有慢又突然吓一吓，有令观众坐过山车嘅感觉。加上编剧好叻用伏笔，电影前后有唔少可以呼应嘅情节，睇得好舒服。
当然都难免有沙石，港漫中难免有叔伯恩怨设定，哩啲点拍点写都麻麻地。最大问题系，其实陈洛军系香港出世，本身可以攞身份证。不过讲故唔好搏故，哩个沙石个人觉得冇太影响整体气氛。大家又点睇，不坊讨论下。
演员识得演 唔系咁易
如果大家有睇动画《我推的孩子》，天才童星过戏后只好拍烂片，面前冇budget嘅场地、冇戏嘅对手、求其嘅制作，自己演技再好都无从发挥。但最惨嘅系，大众系唔会理场口因素，雪亮眼睛一眼就知演员好唔好戏，但佢哋从来唔会理解一个「演技」系包咗美术形象动作导演嘅想法，有时真系唔到演员去演绎。所以一路讲戏，我都会避免讨论演技，亦都唔好意思讨论。
但系今次唔同，演员们嘅表现正正表达到我对演技嘅想法：
- 导演知要用咩效果；
- 动作美术指导出色；
- 演员有时间去沉浸；
王家卫导演电影时不时就拍五年十年，演员们有时间去浸淫喺角色当中，紧系扮得似啲啦。然而普通电影制作时间半年唔够由前期到上映，心理细节不能追求更高，就会畀观众一个「新演员唔识嘅感觉」，观众系唔会错嘅，只不过对电影哩回事睇得唔够通透。
讲返本片，动作夹快到位，花式华而到肉，加上利用城寨特色进攻，例如小巷、天线水喉等，都加深观众沉浸感。不得不提四仔（张文杰绎）长时间带面具，只可以运用眼神动作去演一个神秘角色，难道之高表现出色。其他大部分角色都有合格以上嘅成绩。
尽咗力 做得好
又要鞭一鞭「明日战记」，明明大家都系三亿制作，畀一个CG佬做咗条showreel。本片导演就好了解自己想做咩畀观众。就系要做一条本土爽片，有本土香港，有爽快打斗，有畀青年演员上位嘅机会，有畀世界睇到香港电影仲有光彩嘅一面。讲真嘅，爽度剧情整体都不比marvel漫改电影差。当然唔可能同其他IP比较，人哋做咗廿年，我地先刚刚开始，有好多野要摸要试，但依家先第一集，期待团队keep住把火，愈做愈有。既然香港有人有心有力做得出好戏，不如大家都支持下。