贺岁尾水推一推《临时劫案》，剧本细节充足嘅cult片，竟然喺合拍片揾到

话说小弟唔太喜欢近十年嘅贺岁片，原因相信唔需多讲，角色陈腔滥调、剧情十年如一。但月初朋友睇完麦启光导演嘅《临时劫案》后竟然向我大力推荐，所以昨日就同女友去一睇究竟。谁不知唔睇犹自可，一睇笑呵呵。小弟今日想喺借贺岁尾水期向大家推介一下，本人认为近十年，其中一套香港电影最佳剧本，都浅谈一下电影成功嘅地方。

 

故事由两单劫案开始，来由东南亚嘅大贼「梅蓝天」（郭富城饰演）带同重火力武器打劫找换店。同一时间，一个负债青年人「阿南」喺同一条街用小刀打劫另一间找换店。而梅蓝天小弟因为要逃避警方追截，把打劫钱袋放在路边的士车尾箱上，却被阿南见到，即刻去偷的士上的大钱袋，谁不知自己打劫的小钱袋意外留在车尾箱。而的士主人「笠水」（林家栋饰演）同负债老人院老板「无用辉」（任贤齐饰演）因生活压力而决定打劫，而过程却虾碌不断，由买枪开始笠水已经「打斧头」将原价18000嘅枪讲成38000。最后更是因为钱在更衣室被「泳池老鼠」（爆locker嘅小偷）偷去而连枪都买不成，反而遇到想揾番大钱袋嘅真大贼梅蓝天。梅蓝天在得知两人情况后，加上小弟已身亡，所以邀请两位「废中」一同打劫。

 

高分剧本

 

简单介绍完故事线，大家大约都知《临时劫案》系一套「多线群像剧」，而哩种剧目难度系相当之高。要九十分钟内建立多个角色，讲解行为加动机，同时要推动主线副线，各条故事线要做到环环相扣，又唔可以偏袒其中一条线或角色，最紧要，要好睇有剧力。难度好似整啤牌塔一样，故事角色之间支撑起一座塔。例如剧中，梅蓝天就因为小弟得知放钱袋嘅的士车牌号码，而警方用都用CCTV查到，两组人马同时去到笠水同无用辉交收枪嘅地方「泳池」，而同一时间推动「泳池老鼠」喺更衣室偷走阿南打劫嘅钱同笠水买枪嘅钱。首先，其实用locker交收嘅情节唔系新桥，例如刘华嘅《暗战》同《龙凤斗》都有用保龄球场lock嘅情节。而剧中将情节重新包装，香港人都知更衣室locker保安能力有限（唔系都唔会有泳池老鼠啦），令老桥变新，合情合理之外又不失新鲜感。

 

细节大成

 

剧本高分嘅当然唔只因为大桥同结构，《临时劫案》另一个剧本优点系对白。港产片只中一个为人诟病嘅地方系，对白都唔系人讲。有几差大家自己心中有数，小弟都「笠水」怕得罪人，加上编幅有限就唔一一细数。其实不论系大片定本土片，港产片想角色讲一啲精景「金句」，往往「金句」都会听出唯和感，一个好例子当然系「天幕就系我，我就系天幕啦」。反之，太过平淡贴地嘅对白，又无咩feel。而对白喺《临时劫案》高分嘅位系，佢嘅对白系人讲嘅，同时又几有意思。梅蓝天口头禅系叫人讲「多谢」同埋「sorry」，听似好普通但畀郭富城以东南亚口音同埋节奏讲出嚟莫名地有喜感，都特别入耳，哩度系合格线。结局将哩两句对白意义反转，为角色转变加上一重意义，哩个就系高分位。用最基本嘅说话打造角色立体感，系细节满分嘅设计之一。

 

合拍出本土

 

今年贺岁片有三套，分别系今次讲嘅《临时劫案》、偶像群舞《盗月者》、无人气主角嘅人气续集《饭戏攻心2》。头盔要带好，《盗月者》嘅演出其实比想像中出色，《饭戏攻心2》小弟无睇但朋友睇完话系做到第一集嘅笑点。反而《临时劫案》本身期待值比较低，却做出香港人笑得出嘅贴地故事。其实我笑得出，因为喺《临时劫案》身上现到我哋口中喜爱嘅香港，80年代至90年代嘅香港电影。点解话《临时劫案》系cult片，因为当中有啲粗制嘅CG加上低级嘅视觉元素，例如有大佬手指中枪，只手指喺地下跳咗两下。香港地成日讲本土本土，又讲一剧之本，但最后竟然喺合拍片见到香港。我哋系想睇好嘅故事好嘅剧本，还是想断续上十年陈腔滥调嘅剧情角色，只要睇到自己钟意嘅明星就够呢？