賀歲尾水推一推《臨時劫案》，劇本細節充足嘅cult片，竟然喺合拍片搵到

話說小弟唔太喜歡近十年嘅賀歲片，原因相信唔需多講，角色陳腔濫調、劇情十年如一。但月初朋友睇完麥啟光導演嘅《臨時劫案》後竟然向我大力推薦，所以昨日就同女友去一睇究竟。誰不知唔睇猶自可，一睇笑呵呵。小弟今日想喺借賀歲尾水期向大家推介一下，本人認為近十年，其中一套香港電影最佳劇本，都淺談一下電影成功嘅地方。

故事由兩單劫案開始，來由東南亞嘅大賊「梅藍天」（郭富城飾演）帶同重火力武器打劫找換店。同一時間，一個負債青年人「阿南」喺同一條街用小刀打劫另一間找換店。而梅藍天小弟因為要逃避警方追截，把打劫錢袋放在路邊的士車尾箱上，卻被阿南見到，即刻去偷的士上的大錢袋，誰不知自己打劫的小錢袋意外留在車尾箱。而的士主人「笠水」（林家棟飾演）同負債老人院老闆「無用輝」（任賢齊飾演）因生活壓力而決定打劫，而過程卻蝦碌不斷，由買槍開始笠水已經「打斧頭」將原價18000嘅槍講成38000。最後更是因為錢在更衣室被「泳池老鼠」（爆locker嘅小偷）偷去而連槍都買不成，反而遇到想搵番大錢袋嘅真大賊梅藍天。梅藍天在得知兩人情況後，加上小弟已身亡，所以邀請兩位「廢中」一同打劫。

高分劇本

簡單介紹完故事線，大家大約都知《臨時劫案》係一套「多線群像劇」，而哩種劇目難度係相當之高。要九十分鐘內建立多個角色，講解行為加動機，同時要推動主線副線，各條故事線要做到環環相扣，又唔可以偏袒其中一條線或角色，最緊要，要好睇有劇力。難度好似整啤牌塔一樣，故事角色之間支撐起一座塔。例如劇中，梅藍天就因為小弟得知放錢袋嘅的士車牌號碼，而警方用都用CCTV查到，兩組人馬同時去到笠水同無用輝交收槍嘅地方「泳池」，而同一時間推動「泳池老鼠」喺更衣室偷走阿南打劫嘅錢同笠水買槍嘅錢。首先，其實用locker交收嘅情節唔係新橋，例如劉華嘅《暗戰》同《龍鳳鬥》都有用保齡球場lock嘅情節。而劇中將情節重新包裝，香港人都知更衣室locker保安能力有限（唔係都唔會有泳池老鼠啦），令老橋變新，合情合理之外又不失新鮮感。

細節大成

劇本高分嘅當然唔只因為大橋同結構，《臨時劫案》另一個劇本優點係對白。港產片只中一個為人詬病嘅地方係，對白都唔係人講。有幾差大家自己心中有數，小弟都「笠水」怕得罪人，加上編幅有限就唔一一細數。其實不論係大片定本土片，港產片想角色講一啲精景「金句」，往往「金句」都會聽出唯和感，一個好例子當然係「天幕就係我，我就係天幕啦」。反之，太過平淡貼地嘅對白，又無咩feel。而對白喺《臨時劫案》高分嘅位係，佢嘅對白係人講嘅，同時又幾有意思。梅藍天口頭禪係叫人講「多謝」同埋「sorry」，聽似好普通但畀郭富城以東南亞口音同埋節奏講出嚟莫名地有喜感，都特別入耳，哩度係合格線。結局將哩兩句對白意義反轉，為角色轉變加上一重意義，哩個就係高分位。用最基本嘅說話打造角色立體感，係細節滿分嘅設計之一。

合拍出本土

今年賀歲片有三套，分別係今次講嘅《臨時劫案》、偶像群舞《盜月者》、無人氣主角嘅人氣續集《飯戲攻心2》。頭盔要帶好，《盜月者》嘅演出其實比想像中出色，《飯戲攻心2》小弟無睇但朋友睇完話係做到第一集嘅笑點。反而《臨時劫案》本身期待值比較低，卻做出香港人笑得出嘅貼地故事。其實我笑得出，因為喺《臨時劫案》身上現到我哋口中喜愛嘅香港，80年代至90年代嘅香港電影。點解話《臨時劫案》係cult片，因為當中有啲粗製嘅CG加上低級嘅視覺元素，例如有大佬手指中槍，隻手指喺地下跳咗兩下。香港地成日講本土本土，又講一劇之本，但最後竟然喺合拍片見到香港。我哋係想睇好嘅故事好嘅劇本，還是想斷續上十年陳腔濫調嘅劇情角色，只要睇到自己鐘意嘅明星就夠呢？