《百元之戀》燃燒吧！廢柴！

近日重睇2014年日本電影《百元之戀》（日：百円の恋），由武正晴執導。香港人對導演嘅了解應該係2019年佢執導嘅《全裸監督》，但喺小弟心目中《百元之戀》絕對係導演嘅神作。

故事講述一個集loser特點於一身嘅女主角一子，具體來講，一個不修邊幅、體重過高、唔番工每日淨係喺房打機、衣來張手飯來張口……但自問看透世事嘅廢青。一子覺得就算努力咗都係一L樣，咁不如躺平，如事者一條L樣活到32歲。哩個不變嘅日常出現變化，一子妹妹離婚，同個仔返屋企住。妹妹睇唔起一子廢到32歲人都要老人家照顧，一子都睇唔起妹妹做咗單親媽媽。終於一子頂唔順離家出走（當然出走嘅錢係老母畀嘅）。

一子搵咗平租房住，喺自己常去嘅「100yen店」打工養自己。對一個32歲第一次打工養家嘅人來說唔死都算係咁。當然人以群分物以類聚，「100yen店」中都搵到好多同一子一樣嘅極品。其中就有兩個要特別講下，正所謂「葾豬頭都有㒼鼻菩薩」，一子咁嘅package竟然有人要。第一個就係中佬同事，小蟹柳扮晒蟹，講到自己幾咁勁但都係一事無成，成日flirt一子同佢拍拖；另一個更極品，一個打拳嘅鹽味大叔祐二，喺「100yen店」買過一兩次香蕉就想約一子出街。心花怒放嘅一子當然應承，更有準備打扮下自己（買咗件100yen嘅豹紋內衣）。誰不知祐二想約一子嘅原因，只係因為覺得一子唔會拒絕佢，佢要得到男人嘅認同感。一子聽到真相後心都碎埋，但作為廢柴嘅一子又可以做啲咩。

人到谷底彈得幾高

有一日祐二邀請一子去睇佢人生中最後一場拳賽，中佬同事都攞著數跟埋去。比賽中祐二輸得一敗塗地。打完食飯果時中佬同事一路懶風趣咁笑談風生，仲喺一子唔在場果時講佢壞話，想搞一子。祐二一拳打咗落中佬同事身上就走咗，中佬同事無反抗，因為唔夠打。反而喺祐二走咗後，強行帶一子去「開房」，仲打咗反抗嘅一子一拳。哩度係一個好靚嘅劇情轉節，中佬同事忍祐二一拳，然後下一幕打返一子。一個小人物只可以搵一個更小嘅人物發洩，短短兩幕表現咗一個寫實又醜陋嘅人性特點。而就係果一晚，一子過咗第一次，痛苦又乾澀嘅第一次。

同病相憐，如果你病好，只有我可憐

自從拳賽後，祐二無再出現，一子為咗搵佢而去咗拳館，但就畀拳館老師以為佢想減肥，一子亦開始咗打拳，而祐二則不停賣醉，有一日喺一子店前飲醉酒被一子帶咗佢返屋企。就係喺祐二同一子同居咗一陣。期間一子日日練拳，想變好同時都想吸引到祐二。但祐二不但無為佢打氣，更多嘅只有冷淡。祐二亦好快離開咗一子，因為，喺一子哩個努力嘅廢柴面前，自己係一個真正嘅廢柴。而離開咗後，一子同老師報名，喺32歲拳擊手退役嘅歲數，打自己嘅第一場拳賽。上台介紹自己嘅時候，更播出「100yen店」嘅bgm，因為佢覺得自己人生就係值咁多。

原來有港版？

杜民澤先生執導2017年電影《空手道》，其實就係倒模自《百元之戀》，一個廢青女主角被人呃感情去到谷底然後去打拳。（以下為個人見解，不喜隨便插）首先以女主角來說，偶像出身嘅鄧麗欣都太靚啦，相比之下安滕英演嘅廢柴氣場強好多，哩個可能同劇本或者演員設計小動作有關。其次，日本喺拍攝小人物故事真係世界第一。杜生當然都有投放社會議題，例如當年大媽舞攻入公園，土地問題等。但就有一種同劇情無關嘅感覺。反觀《百元之戀》對社會底層人士有比較立體嘅描述，好似強姦一子嘅中佬同事，佢哋好可憐，同時又唔抵可憐。近年香港都有處理得幾好嘅例子，《麥路人》中張達明因為唔可以企唔返起身立足社會，索性主動入監房。果種輕描淡寫咁拍出可憐同可恨嘅一線之間，令觀眾同情又愛又恨嘅情節，正是社會底層故事嘅精要之處。

輸咗唔代表白過

電影雖然表現得比較極端。但我哋每一個人都有好似一子咁廢嘅自我低落時間。任何人包括自己都睇唔起自己，覺得人生無希望，太遲發出不如躺平就好。電影好睇在於佢好拍得好現實，喺一子準備發力時多數就成杯冷水令佢同大家冷靜。我哋現實都有好多情況，明明好努力但就係無成果，最後連想去努力都好難。我哋每一個人都有一個「價值」，可以好似一子咁，覺得自己只值100yen。但無論值幾多都好，廢柴唔去燃，就真係等發霉嘅廢柴。