健康無價 之 食錯麥

成日都諗有咩topic啱喺專欄分享，作為slasher嘅後生仔又唔係幾好喺大家面前講職場tips，不如講下我另一個興趣，飲飲食食。煮飯都可算係我人生一大興趣，一星期可能都有煮三晚（slasher好處可以多啲時間打理身體）。但煮左幾年，都會開始研究下營養問題。

大家可能都知美國人身型幾咁有福氣，肥胖人口高達50%。可能大家會有刻板印象，覺得佢哋野食大份食得多所以肥，當然係一大原因，但有冇諗過係因為平時嘅主糧出現問題。今日就講一講佢哋嘅主糧--小麥。

小麥係世界三大穀物之一，係世界播種面積最大嘅作物，唔只歐美地區，甚至食米為主中國近年都開始多人轉食小麥。原因無他，一個字，平。相比有一定天氣要求嘅大米，小麥容易種植，加上上世紀基因改造嘅出現，小麥產量相比古代提高六至八倍。但問題正正出現喺基因改造上。

基因改造科學怪「麥」

天然植物會吸收大地營養，抵禦天氣天災蟲禍，一定時間先會有得收成。然而改造小麥係唔會有時間去吸收營養，加上人工方法去抵禦以上問題，大量使用農藥除草劑，食落肚唔知會點呢？

上世紀基因雜交技術出現，令小麥變成科學怪人，現今小麥同天然小麥基因上可以有幾百至幾千條基因唔同。當然有人會話「基因改造增加生產效率，有咩唔好」。係嘅，餵飽更多人，但餵病咗好多人。

覺得唔夠科學？深入分析小麥營養。改造小麥比天然小麥有更多嘅麩質（Gluten），中國人所講嘅麵筋，係一種蛋白質，用作提供麵包嘅咬口。可能大家都會聽過麩質敏感，就係身體覺得哩啲蛋白質係敵人，產生過敏反應。當然，有麩質敏感嘅人唔多，但係唔係代表冇問題呢？

愈食愈無營養

2015年意大利醫生Dr. Alessio Fasano公開有關人體腸道同小麥麩質研究，小麥嘅麥醇溶蛋白 (Gliadin) 會令腸道滲透性增加，即是大家都聽過嘅腸漏。簡單啲講，細胞本身係一個接一接，環環緊扣，但腸漏嘅出現，細胞之間會出現空隙，而令有啲唔應該吸收嘅物質或者未消化好嘅食物進入身體，例如細菌、農藥、重金屬等等一聽就知會出事嘅物質。而重點係天然小麥係唔會令人腸漏。

人類腸道係一個十分重要嘅器官，中學生物堂教我地「小腸吸營養，大腸吸水」，但營養同水其實都會由小腸吸收。咁大腸呢，唔通好似「食神」講裝屎？no no no，大腸最大嘅作用係裝「菌」。大腸菌群多多少少有一百兆隻，同人體有共生關係。例如，胃消化不能嘅纖維，腸菌就會幫我哋分解，再比番微量元素人體，例如維他命K。

而大腸菌群，係需要三代先改變到。而改造小麥只出現幾十年，即係話世界上大部分人嘅人體根本未習慣食改造小麥。我哋先做一個總結，小麥會令小腸腸漏，吸收一啲有害物質；大腸菌又幫群又幫唔到手處理。長期食用會令身體發炎，增加患糖尿病等疾病嘅風險。

麥麥食 食上癮

好多朋友食完麵包會有一種好精神嘅感覺。因為麩質會被身體分解成一種「多呔」，即是「外啡肽」（Exorphin），係會依符喺大腦嘅嗎啡受體（morphinereceptor）。太多用詞好難明？人類食鴉片類藥物就會依符喺嗎啡受體上，引致人上癮。

加上簡單講番人話，小麥澱粉係超級碳水化合物，A型支鏈澱粉。即是食完血糖會急速上升，仲會令人好快餓，食欲唔會消減。基本上食兩塊全麥麵包同飲一罐可樂係一樣咁肥，如果以咁樣嘅比喻下。大家計吓自己一日飲左幾多罐可樂？

最後，哩半年不停研究營養。可能我講嘅野同大家嘅常識有出入，有錯歡迎討論同指證。所謂人無事先做到世一，新一年都想祝大家身體健康。
 

參考

《小麥完全真相》

Hollon, J., Puppa, E. L., Greenwald, B., Goldberg, E., Guerrerio, A., & Fasano, A. (2015) Effect of gliadin on permeability of intestinal biopsy explants from celiac disease patients and patients with non-celiac gluten sensitivity. Nutrients, 7(3), 1565–1576. https://doi.org/10.3390/nu7031565