管理|Exit Interview 的廢話連篇
我個人認為,Exit Interview絕對是職場中最浪費青春,最多餘的程序之一。
理論上,一個好的Exit Interview可以幫助公司了解員工的需要、公司需要改善的地方,進而穩定留下員工的軍心,更妥善的規劃人力資源……。但理論歸理論,現實歸現實,辦公室不是學校,所以很多理論上可行的東西在實際上只是一廂情願。
其實作為一個稱職的管理層,員工的離職應該是意料之中,有跡可尋。等到要人家遞辭職信的時候才問理由,那便已經是不稱職了。當大家代入離職員工的角度,你自然會想:「我而家都唔撈咯,仲同你講咁多嘢做乜?呢間公司嘅發展、存亡已經同我無關。搞到要唔撈,梗係因為做得唔開心,冇得發展或者銀紙唔夠喇。呢啲嘢畫公仔畫出腸就嘥氣啦!提醒你咪棧益咗你,同時又令你你嬲咗我!」
[延伸閱讀: 管理|失業率高真的容易請人? 職場缺乏新血勢成新常態]
至於另一個Exit Interview常問的問題:「你離職之後會在哪裏上班呢?人工是多少?」
這簡直是叫離職員工敷衍應對。當代入離職員工的角度,你自然會這樣想:「我同你非親非故,純粹係一個完結咗嘅賓主關係,我之後嘅發展關你乜嘢事?我都有我嘅私隱,除非你諗住養我啦!一陣間同你講搵到份更加好嘅工,我又驚你眼紅;一陣間話份新工同而家差唔多或者再差少少,又畀你恥笑。既然係咁,不如我同你講幾句花話,話自己要去個旅行先再決定,或者去讀書諸如此類…等你唔好再問落去。」
[延伸閱讀: 管理|讓員工感覺「打自己工」 效率提高更有滿足感]
還有一個十分多餘的Exit Interview問題:「你最喜歡和不喜歡哪部分的工作?公司有什麼需要改善的地方?」。聽到這個問題,作為離職員工自然會想:「你呢個問題問我有咩用?每個人嘅喜好都唔同,我鍾意做呢一部分工作,唔代表其他人都鍾意,你係咪諗住問一個會走嘅員工鍾意乜嘢工作,然後又將呢套標準硬套落留低嘅員工身上呢?既然冇心留我,你問我鍾意邊一部分嘅工作又有乜意義?為咗費事你不斷追問,我一定會答你樣樣工作都差唔多。我而家都走喇,你唔好再逼我勾起咁多不快嘅回憶啦!仲有,公司有乜嘢要改善係你哋班高層要諗嘅嘢,唔係我嘅問題!」
其實一個員工的離開,骨子裏的原因管理層應該心中有數,再問,也只會換來一大堆托詞。其實我有一個想法,如果一個表現良好又稱職的員工選擇離開的話,最需接受interview的,其實是這位員工的上司。