电影观后感-简单讲几句之《花路阿朱妈》

简单讲几句之《#花路阿朱妈》

以前带团时候，我成日都会见到好多唔同嘅人，印象最深嘅其中一团，系一次去北京同内蒙嘅九日团，𠮶一团里边有五个都系独自出发嘅中年、甚至老年人。喺同佢地相处过后，佢地都异口同声讲出左一个共同点: 就算有家人都好，但佢地都好想试下自己一个人去旅行嘅感觉。

而我就系喺林美华呢个角色身上，见到呢几个旧客嘅影子。

人大左之后，其实都不免会为左人地、或者为左外面嘅世界而活，久而久之，我地嘅灵魂就好似冇左一样;林美华(洪慧芳)虽然同仔仔因年纪关系而越渐走远，但仍然一直做好妈妈嘅角色，也想透过一次旅行增进关系; 吴正洙(郑东焕)已届花甲之年，意外地被导游遗落嘅美华闯入独居空间;权宇(姜亨硕)为家人努力工作还债，但偏偏喺团中遗下美华。导演何书铭藉著呢三个都系为别人而活角色，刻划出每个人都失去左自己灵魂嘅心态，借助呢次乌龙旅程，三人相互支撑扶持，重新喺自己嘅人生路上起步，找回久未看清嘅自己，篇幅写来温暖人心。

而主线就在于美华同阿仔之间嘅关系，创作人好巧妙咁透过戏中吕珍九主演剧集嘅寻找母亲剧情，对照美华同儿子越走越远嘅距离作出衬托，一方面将女性对韩剧嘅迷恋融入母子之情当中，另一方面亦带出韩流文化嘅影响同软实力，部份情节相信唔少观众会从自己家人对韩剧嘅入迷程度而揾到共鸣。

《花路阿朱妈》属于一部小品轻喜剧，情节窝心幽默之余，不忘提点我地，唔好忘记自己，只有对自己好，人生先会快乐。

《花路阿朱妈》今日上映

产地: 新加坡、韩国
片长: 90分钟
推荐度: 8/10

编剧: #何书铭 #王欣茹
导演: 何书铭