【韩剧都嚟朝圣？ — Granada名胜篇】

♦️阿尔罕布拉宫篇

有睇过韩剧《阿尔罕布拉宫的回忆》嘅朋友都知道，套剧嘅主要取景地就系西班牙嘅格拉纳达，而剧情所围绕嘅阿尔罕布拉宫有咩咁特别，令到韩剧制作组都要慕名而来？咁就要睇以下介绍喇～

阿尔罕布拉宫系一座13世纪建造嘅阿拉伯式宫殿，包含住庭院、宴客厅、花园、瞭望塔等建筑。上个po就讲过格拉纳达曾经被阿拉伯帝国入侵并统治过一段时间，呢个宫殿正正系当时嘅阿拉伯人兴建嘅，因此带有浓厚嘅伊斯兰教色彩，例如宫殿入口嘅正义之门刻有法蒂玛之手🪬同天国之钥嘅图样。狮子庭院当中嘅喷泉亦将水引向四条小渠，象征住伊斯兰教四条「天堂之河」。呢啲都系伊斯兰教嘅重要象征。

除此之外，宫殿中嘅庭院都采用咗典型伊斯兰教嘅建筑方式，例如运用咗几何、花卉、星形图案密铺殿中嘅圆柱同拱顶，以显示佢哋对宇宙精密度同创造性嘅敬畏。以及仲有唔少华丽又精致嘅景点值得一提，但系碍于篇幅就唔逐一介绍喇，留待大家睇剧/亲临宫中嘅时候自行发掘～

总之呢，呢座宫殿之所以咁出名，系因为佢极具历史、文化、建筑同宗教价值，甚至喺上世纪佢就已经被列入世界文化遗产嘅名录当中。所以话，如果大家有机会去西班牙旅行，呢个绝对系必去景点嚟㗎！