健力动作VS举重动作，究竟各自有乜用，又应该点样用？

入健身室做运动，只要涉及杠铃训练，就会不期然分咗两大派出嚟，一种系专练「健力三宝」，另一种就玩「奥运式举重」。两种动作都用大重量，但偏偏做出嚟个样似同非同，究竟边样好啲，边样又啱你玩多啲？

健力与举重

一般而言，健力动作主要讲三大动作，分别为深蹲，硬拉同卧推。传统训练嚟讲，「健力三宝」可以话系训练动作既皇牌，入健身室只要围绕嚟三个动作嚟练，基本上已经符合咗绝大部份既运动需求。

举重动作，一般指奥运式举重入边既两个比赛项目，即系抓举同挺举，又围绕两个动作延伸出其他动作，都属于举重式训练。特别系近年既举重知识普及咗，越嚟越多人会尝试用举重式训练作为训练既主要项目。

咁系咪新兴既潮流一定好过传统呢？又，其实各自练紧啲乜呢？

发力的不同

两套训练最大既分别，在于发力嚟讲两套动作有著好明显既分别，就系发力既时间。

健力动作，一般可以用较长时间发力，不过，所谓「较长」，其实都系比较，因为相比之下，举重动作系唔可以拉长个发力时间，一下就要做到，做唔到就系做唔到。

呢个情况正正都系两套动作所训练既最大分别：爆发力。

所谓既爆发力，学术啲讲即系神经系统召集肌肉参与动作既时间，爆发力越高，就系神经肌统召集肌肉发力既时间越短（即系越快）。举重动作最明显既技巧，就系快。

相对于深蹲硬拉，两者都可以用一个较慢既速度完成，唔需要下下（更甚至唔建议）用好快既速度去做完一个动作。健力动作最大既重点，在于同时间令尽量多既肌肉去参与动作，因此即使只系主力训练健力动作，依然可以有效令全身既肌肉都有参与训练，而唔会太过孤立地只练咗某部份肌肉。

二拣其一？实际上缺一不可

所以系训练上，系咪代表两样只应拣一样？好明显既答案就唔系，更重要既系，其实两套动作都应该要练，只系基于你既训练需要，偏向练边一样嘢多啲。

健力动作有效令全身肌肉参与训练，但问题系佢无逼使你既肌肉需要快速，短时间内收缩用力。因此，如果系面对一啲突发情况时，需要突然用力既效果就会较弱。

但系，单纯针对举重动作做训练，虽然可以提升爆发力，但爆发力既前提，系需要有肌肉去支持。即系你可以好短时间去好多肌肉发力，但系好多肌肉都无乜力嚟讲，加埋一齐都唔显得特别大力。

一般既爆发力训练，都系以提升肌力为前提，以举重动作为终点。所以如果真系想训练举重动作，其实都唔可以避免用健力动作做训练。而只系训练健力动作，就未必有效令训练效果提升为其他运动效果，特别系需要跑同跳既运动。

你呢？你又点解需要做运动？