做运动只系计算卡路里就够？你必须要知既唔同类型运动对你运动有乜效果分别！

如果你既运动目标系谂住修身，相信你都会听过，运动既目标需要达致几多几多既卡路里消耗，先算得上符合几多几多既目标等等。问题嚟啦，如果单纯净系睇个数字，系咪就代表咗运动效果呢？如果你心入边既谂法系似系又似唔系，以下既分析应该帮到你。

跑步与划艇？

健身室系唔同类型既带氧训练器材，咁跑步同划艇有乜分别呢？假设两样运动做既时间一样，心跳率一样，消耗卡路里一样，咁两种运动系咪会有同样效果呢？

跑步，站姿开始既运动，用既肌肉力量需要承担全身体重；划艇，坐姿开始既运动，系咪代表舒服啲运动量会低啲呢？但系一般嚟讲，跑步机既数量多数都多过划艇机，系咪代表划艇机相对无乜用？

如果今日只系考虑卡路里消耗，事实上，两部机既效果真系无乜大分别。事关卡路里消耗就系一个单纯既数字游戏，减咗就系减咗，有减就系有减。当运动目标只系消耗卡路里嚟讲，其实真系拣边个都得，咁但系点解大家会倾向拣跑步机而唔系划艇机呢？

舒服啲，可能系唔少人既理由。

事实上，划艇机虽然系坐系度开始既运动，但当你真系玩过既时候，其实划艇呢个动作一啲都唔轻松。而且涉及既技术比起跑步多，起码跑步好似人人都识，但划艇就唔一定啦。

但唔系话消耗卡路里一样架咩？咁点解有一样辛苦啲，一样无咁辛苦？

好明显既答案，就系运动型式唔同。

运动型式与运动效果

划艇机会比较攰既原因，系因为划艇用到既肌肉可能好多人系日常生活都无乜点用，所以显得个啲肌肉要用力既时候就较为辛苦。由此可见，当你拣一样运动去做既时候，就算目标只系消耗卡路里，其实系呢个数字既背后仲有唔同既结果会出咗嚟。

点解同样都系跑步，同样都系跑咁多时间，但一般嚟计跑街会比用跑步机消耗更多？因为跑街用到既肌肉同跑跑步机唔同好多。事关街既情境会有唔同既高低起伏，地面软硬等等，导致个人需要既发力会唔同咗，再加上，跑步机系一部辅助器材，佢一边郁，帮紧你郁，即系就算系同样一个跑步动作，你既力量都会用少咗。

同样道理，即使只系消耗卡路里，你既动作唔同，就代表你需要用到既肌肉唔同。又正如上文提过，因为划艇用既力系大部份都市人平日少用既肌肉力量，所以会觉得更辛苦。

既然系咁，当有时间做运动既时候，如果可以练埋一啲平日无练既嘢，又可以达到同样卡路里消耗既话，系训练上边系咪一举两得呢？

你需要既效果只有消耗卡路里吗？

话返转头，点解你会谂住做运动系为咗消耗卡路里？

或者系身体健康，或者系修身减脂，做运动最基本既原因，就系要令你个人由无乜郁变成郁返多啲。不论系为咗健康或者修身，其实点样做运动都对于你成个运动效果有好大既影响。例如用既肌肉群组唔同，就已经影响紧你整体既肌肉量会唔会更易更快流失。

要知道，人体既肌肉生长原则就系「用进废退」，即系话，用得多既肌肉会留低，用得少既肌肉会消减。会有呢个结果，系因为肌肉流失系人体成长过程当中必然会出然既情况，不过，亦都系因为「用进废退」既原因，如果你能够持续做运动，持续令肌肉参与，其实肌肉都会有所保留，甚至增长。

健康系健康，瘦系瘦。训系张床唔郁一个月，净系吊盐水，一样生存到，一样会「瘦」，呢个系咪修身既理想目标？健康既目标，就系起码令个人有力去做想做既事。如果本身已经少做运动，或者系好难得先有时间做运动，咁就应该谂下有乜运动可以令自己健康更有帮助。

例如以带氧运动嚟计，划艇可以大幅活跃你平日少用既肌肉，虽然做完全全身更痛，但系呢种效果或者先会唤醒返你做运动既基本目标。「No Pain No Gain」呢句说话用系运动上就最直接：训练后既酸痛，其实系赚取紧你既肌肉成长。