你估唔到！营养师都会教你用既「相机食先」修身法！
唔少人会笑话，点解食饭前要先影相，系想收保护费？定系觉得自己好似伟大一样咁重要？非也，实际上，用相机影低自己食乜，除咗可以系万一发生咩事食物中毒无故身亡既时候作为证物之外，更重要系可以帮到唔少人都想要既目标：减肥。
无错，相机食先的而且确系一种减肥方法，更甚至系营养师都会叫你用既减肥方法！
点先为之「相机食先」减肥法？
固名思义，食乜嘢都要拎部相机出嚟影相先为之「相机食先」，讲就简单，但有几个要求必须要做到。
1）诚实：每一样放入口食既嘢都要影一张相，系每！一！样！
不论系正餐定零食，白饭定白兔糖，食几多影几多，每一次都要影咗先放落口。
2）公开：相机食先既另一个重点，系要话比人知！
你影底既相如果自己收收埋埋就无乜意思，无人知你影咗乜，亦无人可以帮到你。就算唔想完全公开比人睇，都应该要比你既营养师／教练／亲戚朋友兄弟闺蜜睇，咁先有人督促你！
3）检视：当影完一日相，自己重温返影咗啲乜，呢步先系最紧要！
实际上，「相机食先」既最大功用，就系令自己可以重新睇下自己全日嚟讲究竟放咗啲乜嘢入口。睇返啲相，就算数字唔完全准确，都大约可以睇到究竟食咗几多脂肪碳水蛋白质！
修身第一步：计算卡路里！
事实上，任何修身方法都好，不论增重或减磅，想要有效率，首先应该要先计一计卡路里。
你需要知道既系，究竟你一日会大约消耗几多卡路里？又，你一日又会食咗几多卡路里？如果你想增重既话，你食既应该要比消耗更加多，如果你一直食极都唔够，咁就唔会增得到；相反，如果你想减重既，你食既就应该要比消耗少。当然，如果你想唔调整饮食既话，亦可以考虑增加运动量嚟提升运动消耗，一样可以减到重！
另一方面，除咗单纯既热量数字之外，更加重要既系你一日入边食既餐单，究竟点样分布营养素呢？2000卡既脂肪同2000卡既蛋白质，唔会话边个肥啲瘦啲（因为一样都系2000卡），但系你都会感受到有好明显分别！所以，当知道咗自己一日所需要既卡路里后，就要睇下自己有无好好分配唔同既营养比你自己！
唔知点计？不妨上嚟我个人网站有个免费既热量计算器随便你用。
热量计算器：
社群支持亦系成功重点
而近年亦会经常见到，唔少人会开一个IG专门贴自己既食物相，到底有乜用呢？其实都系属于「相机食先」减肥法既概念。
除咗话影低啲相可以比自己睇返自己食咗啲乜，更重要系比人地都睇到你食咗啲乜。如果你既目标系减肥，当你既相片入边似乎吸收太多卡路里，相信你身边既人见到都会不禁问一句：「食呢啲真系得？」
当有人比咁既评价时，第一个反应千祈唔好嬲，应该要谂下点解人地会咁问？纯粹口痕搏虎先问吖？定系真心关心你既健康先问呢？
而且，如果你会在意自己影既相靓唔靓，其实同时间都会提升紧你既食物质素。当你为咗整得靓靓比人睇，又同时顾全唔可以比人话既时候，你就会细心谂下一餐食乜好，又应该食啲乜先会令人觉得「哇，比心机」，甚至系「我都想跟住食呢啲」。
呢啲支持同鼓励，其实都系减肥修身既重要动力。
最难就系坚持！
其实点讲都好，所有方法都有用，唯独是你可以坚持几耐？
要记住，每一餐都坚持影相，其实一点都唔易，如果你能够做到连一杯水都影相，坚持到咁极致，你成功既机会又会再大一啲。透过公开自己既目标，身边社群既支持，其实都系令自己坚持落去既能力。
所以，就算系「相机食先」呢种听落咁奇怪既方法，如果你坚持到，其实都系一个非常有效既方法。
比心机！
（撰文：钟礼贤师范，专项研究武术的运动教练。国际跆拳道联盟国际教练，黑带五段师范，多年来热心于研究跆拳道的历史和技术，透过运学科学实践验证，为融合武术与运动科学而努力。）