云妮变强妮（二）：点为之攻击？攻击有乜用？
上回讲到，云妮系街比人车咗一巴之后变咗黑面，啊唔系，系眼前一黑之后就入咗医院。系佢留院期间，佢发𡚒图强，觉得点都要揾样功夫学下，就算唔可以保家卫国，都可以自卫防身。但系，武术类型多如恒河沙数，先唔以武术种类去谂，究竟一巴车埋嚟点解会揾？有乜功夫可以一巴车返晕人地，又可以防止比人车巴晕呢？
以武术嚟讲，攻击既终极目的，就系令目标失去行为能力，咩叫失去行为能力呢？最极端嚟讲就系死亡。事实上，攻击本身既意义，来自于心理学上「战或逃」既反应，如果决定咗一战，就当然至死方休（不论对手定自己）。根据心理学大师佛洛伊德既简单分析，人生在世，不外乎「追求生命」同「逃避死亡」。如果要令身体产生要同人决战既心理状态，的确「唔系你死就系我亡」。
咁讲法系咪好残忍，系架，事实上，打仗都系咁。打仗，战争，即系国家同国家之间既打交，一个国家攻击另一个国家，另一个国家又反击咁，咁为咗乜？咪一样想对方「失去行为能力」，无办法再做某一啲动作（例如反抗）。所以，武术既终极目标的确系由此所产生。
不过，同样道理，由于打仗实在太残酷，所以国与国之间尽可能都唔想开战。人类当然一样，追求和平既心态，都系为咗唔想不断你打我我打你咁，好彩既可能一个赢就一个输，但更多情况都系两败俱伤。只不过，想还想我都好想好似中咗头奖，有嘢唔使做老板又吹我唔胀。要维护和平，并唔系单靠有伙热爱和平既心就可以做到，武装自己，先有方法达到和平。
正如网络流传一句名言，「学拳就系为咗令人同你讲道理」，遇上蛮不讲理既人，其中一个原因就系佢觉得自己真系好好打，有乜唔对路就出手打到你认同佢为止。但当人地知道出手系打你唔赢，就会开始同你讲道理。
所以，实际上既武力，就系起码要有令人唔敢攻击你既实力。又或者系，当人地攻击你既同时，佢就会遇上更可怕既攻击，咁人地就会唔敢乱出手。
「咁究竟攻击嚟讲又有咩分类呢？」云妮拎住个枕头左抛右抛咁自言自语「其实都唔系下下都要打人吖，当人系鱼咁挞来挞去都系一种攻击啫？」
无错，上次都有提过，攻击方法主要有三种，分别系「站立技」、「地板技」同「摔挞技」。咁究竟呢三种技术系点变样令人失去行为能力呢？咁就要用另一种分类法，分别为「打击技」、「关节技」同「绞技」啦。
「打击技」
顾名思意，真系打落去，一种直接攻击。点解打击技会有效呢，主要因为两种原因：
一）脑震荡：脑系负责维持身体运作既重要器官，当脑部受到巨大外人撞击时，就会令脑部受损，咁就会直接影响中击者既行为能力。另一方面，头部受到外力冲击时，亦有可能令负持维持身体平衡既系统无法运作，为咗「保护」受击者，个脑就会短暂「熄机」，以令受击者唔好再行动而产生伤害；
二）内出血：要维持身体运作，除咗个脑要清醒工作，仲要靠身体循环以令身体唔同部位、器官、肢体可以获得营养同能量继续工作。内出血虽然睇唔到，但事实上就系系身体入边破坏咗个循环系统，继而令各个器官无办法再运作落去，亦会引致死亡。
但系咪每一下打击都要做到上述效果先至有效呢？又唔啱，因为身体有保护机制，当佢收到既「刺激」，例如撞亲，比人打，或者跌咗落地下，其实都会令身体产生警号。其中一种警号就系「痛感」，「痛感」既产生就系提醒身体使用者本人，痛既位置有受伤既风险，唔好再比人整亲啦。而如果所承受既「刺激」可能已经直头令相关位置严重受伤，无办法再运作，咁就会产生「剧痛」，「剧痛」会强烈阻止身体使用者唔好再活动，以免承受更大既伤害，系呢种情况下，就系透过令攻击目标产生「痛感」而促使佢「失去或放弃行为能力」，咁就系攻击既目标啦。
点解会话「痛感」只系一种「讯号」呢？因为呢种感觉，系可以克服既。例如有啲人完全无被撞击过，身体唔知咁既情况会唔会受伤，所以会变得好敏感，轻轻撞到都会好痛；但同样既力撞落一个打开拳既人身上，就未必会痛。力度无变既情况下，点解一个痛，一个唔痛？原因就系另一个人既身体已经适应咗，呢种刺激唔会构成伤害，所以就唔需要发出「痛感」呢种讯号去提醒个身体使用者。
亦因为咁，「抗打」练习就系为咗令身体可以承受呢种「刺激」，减弱「痛感」既敏感性，咁就实现真正既「唔怕痛」啦。
另一种情况，都系透过打击技而令人失去活动能力，就系透过打击，击中身体既神经系统，导致身体接受一种强制放松既身体讯号。例如攻击肝脏为例，因为肝脏被大量神经线包围，但外边又无足够既肌肉骨骼同脂肪去保护，所以当肝脏受到攻击或者撞击，都会诱发神经系统产生一种放松既讯号，令身体唔好再活动。
「关节技」
当你明白打击技会产生「痛感」令对方失去行为能力，而关节技基本上系一模一样既原理，只系针对既目标唔同，系关节。
关节，即系骨同骨既连接。要知道，身体需要产生动作，除咗肌肉发力之外，骨头都系重要负责输送力量既部份。正如杠杆原理一样，如果有力，但支杠杆本身受唔到力，力量都好难传到目标。如果骨同骨之间失去连接，咁就无办法再正常发力。
关节技既目标，就系系解剖学上真正令关节「失去活动能力」，透过令关节无办法正常活动，从而达至令目标「失去行为能力」。举例，一只手要折埋，肘关节就必需要正常运作。如果透过关节技令肘关节移位，咁就几乎等同废咗一只手。
亦都因为身体内里知道呢个问题，所以当针对关节施力时，身体会更易产生痛感，系练习情况下，被施力者会「投降」以希望对方唔好再用力扭断自己既手手脚脚，咁先可以保住活动能力。
令一方面，关节技亦都系系实质意义上既「控制对方」。因为当掌握咗关节既原理，就算唔令关节移位，亦可以令对方无办法发力，甚至透过关节本身既连接，反向用力，令对方全身被控制，继至出现倒地，或者无法用力反击既情况。一般所谓既「擒拿术」，或者日本既「合气道」，都系擅长呢种类型既关节技。
「绞技」
绞技既原理同技术，相对于关节技有异曲同工之妙。「关节技」针对关节，「绞技」就针对颈部位置。主要目标就系透过紧锁颈部位置既气管或者血管，令攻击目标无法呼吸或者身体无法供血到脑部。身体又会因为保护机制，会尽快停止运作，以避免脑部会因为唔够血用而无法工作。
身体之所以要有呢啲保护机制，主要就系为咗确保身体唔好再受伤，同埋系资源有限既情况下（例如血同氧气），尽量可以节省消耗，所以会令身体陷入「昏迷」，以令个身体尽可能保住最低最必须既工作能力。
「咁计法，系咪应该先由唔怕比人打学起呢？」云妮望住果个比佢催残完既枕头，谂谂下，其实佢咪同个枕头一样不堪一击？咁计法，学乜都无用啦。
呢个时候，云妮发现门口有好多奇异既眼光望住佢，似乎都系以为佢痴咗线。
云妮忽然觉得块面有啲热热地，转过身望返住窗边。到底，点先唔怕比人打呢？