云妮变强妮（一）：乜嘢系功夫？

话说有一日，云妮系发现自己训咗系医院。「点解呢？」云妮谂咗一阵，终于记得返。「就系因为我无学功夫？」

 

事关点解云妮会入咗医院呢？作为一个普普通通既Office Lady，当然人生就无乜特别目标，储储埋埋啲钱无嘢做就拎去买Hermes。佢自己就紧系觉得自己平平凡凡，普普通通，但系系贼人眼入边又点会咁谂呢？哇，个袋拎去咪拦站都卖到几皮嘢架㖞，你又咁纤瘦薄弱，唔抢你抢边个啊？于是，有一日，云妮就比人当街抢手袋。

 

人生都无乜目标既云妮，辛辛苦苦买返嚟既Hermes咁易比你抢架咩？紧系搏条后生命都同你死过，不过，弱肉就紧系强食，系佢出尽力系度打打打咁打人手板个阵，人地一下打埋块面度，佢就晕咗，醒返，就系医院啦。

 

「咁我应该学乜功夫好？」身为屋企收埋十几廿个Hermes袋既云妮，当然唔会就咁就以后唔拎啲袋出街，咁点算呢？即系总会有下一次比人打同打劫架㖞，为咗保护自己，于是乎，佢就走咗去睇究竟应该学乜功夫好啦。

 

话时话，其实功夫，Kung-Fu，又唔系净系关打交事。著名大导演王家卫就曾经讲过，「功夫就系将一件事重复做到极致」，所以功夫又唔系净系可以用嚟讲打交。如果我地好认真咁去探讨，乜嘢系功夫既话，就应该用「武术」，Martial Arts去思考一下，究竟乜嘢先系武术。

 

其实小至细胞大至国家，同人类相关既生命体，几乎都会有冲突。小朋友细细个连打交系乜都未知，一样都会揽埋一旧，你扭下我，我挞下你咁。所以「打交」嚟讲，其实系与生俱来既本能，唔系净系人类识，系连动物都会识。

 

不过，人类叻就叻在识得将知识纪录同保存，所以，所谓既「武术」，就系一把人将自己打交既经验，打得好可以点保存，打得唔好可以点改进。好似云妮咁，既然知道交就一定要打，打唔好既经验就唯有尽量去弥补，难逃那烦恼，修修补补乱世中一起苍老。

 

所以，武术其实本来就系一堆打交既技术，我地先唔好用甚么门派啊，风格去分先，我地试下由武术既技术本身去分析，究竟乜嘢系功夫，乜嘢系武术呢？

 

武术有乜技术？

 

其实一般人类设计都系差唔多，两只手两只脚加个身加个头上下，我地以运动嚟讲，一般都系用四肢，即系两只手两只脚，所以打交嚟讲多数都系用四肢为主既（咁当然都有人用头用牙甚至用声音添），先唔好计刀枪箭炮用武器既技术先，简单嚟讲，武术主要分三种技术。

 

第一种，站立技，企系度做既技术；第二种，地板技，跌咗落地，系地下同人打既技术。咁第三种系乜呢？第三种就介乎系中间，不过通常都系整人落地既技术，一般就称为「摔挞技」。

 

「摔挞技」即系乜呢，其实令人跌落地嚟讲，都分两种技术：一种就系用力抛人落地，通常叫「挞」，另一种就系令人企唔稳跌落地，通常叫「摔」。

 

你可能会问，都系落地啫，有乜分别呢？其实系完全两套唔同出发点既技术嚟架。试谂下依家有人放咗盆桔系你门口，你想搬佢入屋或者搬走佢，都要谂方法搬吖，咁你会直接弯腰用力搬吖，定系揾嘢升起佢再搬呢？呢个时候你就会发现，明明都系搬郁一样嘢，点解会有唔同方法呢，就系「摔」同「挞」既分别啦。

 

「摔挞技」系英文嚟讲就系Throw and Take-Down。Throw，一般形容系柔道既摔法，就系主要借力去「摔人落地」，Take-Down，多数就系摔跤用既技巧，一系冲埋去捉人只脚搬起人，一系就揽住人地个身转人落地。

 

咁你好自然想问「喂唔系㖞，柔道唔使用力架咩？」，唔系咁讲，不过柔道本身既招就系要令人「企唔稳」先用得著既，试谂下，一个好有型既「背负投」，你睇佢好似拎住包米咁向前「挞人落地」，但其实「背负投」最理想既情况，并唔系用力升起你，而系令你企唔稳跌落我个背脊，再借力转圈令你碌去前边咁解。所以一般嚟讲，柔道招要成功用到，第一步就系要「破势」，即系要令人失去平衡，开始想跌啦，然后先「帮佢跌」咁解架啫。

 

「好似好有型㖞都。」云妮系张床度揽住个枕头左抛右抛咁，但系始终都解决唔到一个问题，「但人地系一巴车埋嚟，咁我应该点算呢？」下次我地就讲下，究竟武术系点打人，同埋点唔比人打架呢。