獨遊之旅～台北 Day3 Part2

去完松山文創園區後,就搭捷運去下一個景點.一講起台北,最代表性既建築物,就一定係台北101,其實我自己都幾鐘意去一啲觀景台睇景色,之前去東京,都有去skytree睇吓,望落去真係幾靚,今次去台北,又點可以放過台北101呢！

搭左幾個站後,黎到台北101/世貿站,我揀咗5號出口,一出站,企係大馬路上,枱頭一望,101就係面前,綠色既設計,筆直既外型,顯得與外圍既建築物不同！入到大樓,先經過商場,才可以到觀景台既入口,今日人樓唔算多,排左十至十五分鐘左右,再搭𨋢上去.一出𨋢,成個台北盡在眼前.今日天朗氣清,景觀非常清晰,清到每一幢建築物都望到,呢一刻,只會攞住部電話周圍影！

大概逗留左一個鐘後,就離開101,其實差唔多入夜,要食晚飯,之前去士林夜市,當然唔夠啦,所以揀左另一個夜市「饒河夜市」.呢個地方,係我今次黎台北最鐘意既地方,沒有之一！首先講交通,好多人會教去饒河夜市,係松山站1號出口,但其實係錯,以我今次既經驗,應該5號出口會更方便,一出站,望向對面,已經係夜市入口,夜市既牌坊非常多人影相.呢個夜市似一條食街,中間兩旁既檔口全部都係食,唔講咁多,即刻帶大家睇下有咩食！

一入到饒河夜市,最多人排隊既,就係「福州世祖胡椒餅」,所賣既野就好似上海生煎包既豬肉包,用爐烤熱,我買左一個來試,一攞上手,非常熱辣辣,裏面烤得非常香,胡椒味不太濃,但我自己認為呢個唔算特別推薦,雖然好多人排隊,但味道唔係太突出,不過如果係第一次黎呢個夜市,係可以試下既.

食完胡椒餅，繼續行下有咩食，呢度真係好熱鬧，人頭湧湧.行行下見到一間買山豬肉腸既鋪頭，見到燒得非常靚，而且有唔同既調味料揀.台灣夜市既小食，好多時會有唔既調味料俾你揀，例如:酸辣，孜然，胡椒等等.呢間山豬肉腸都唔例外，有唔同既調味揀，買左三條黎食，一百蚊台幣.同一般既豬肉腸唔同，會比較重豬肉味，而且我揀左檸檬汁調味，酸酸鹹鹹，非常惹味，超級推介！

食完之後，再行多陣，再食多少少，要飲番杯野，見到有間[九龍城香港茶]，賣港式飲品，食左咁多野，飲番杯涷檸茶消濟，爽哂！

第三日既行程就完結，之後個日就翻香港，行程唔會有太多，想知我最後一日既行程，請留意Day4!