獨遊之旅～台北 Day3 Part 1

黎到台北既第三日,今日集中台北市中心遊走,逛一逛.第一站,先去一間人氣爆燈既牛肉麵,第一次黎台北,有幾樣野係必食,牛肉麵係其中一樣,係網上有好多推介,其中「林東芳牛肉麵」就榜上有名,好多網站都推介呢一間,所以今日晏就就黎左呢間！

位於南京復興站同忠孝復興站之間既「林東芳牛肉麵」交通尚算方便,出捷運站行大約五至八分鐘,由於之後有行程,所以早左到店舖.大約中午十二點,已經有啲人排隊,大約等五分鐘左右.其實林東芳以前並唔係位於而家個位置,舊鋪相對狹窄,裝修較舊,而家新鋪樓高兩層,座位之間寬敞,而且用左木系風格.

入到去坐,望一望餐牌,選擇並唔多,只有幾款牛肉麵同小食.係台灣黎講,價錢唔算特別平,但對於香港黎講,算幾平.平均四五十蚊一碗！好快簡好左食咩,叫左碗大牛肉麵同花干（豆卜）,台灣既牛肉麵係普遍較清淡,湯底唔算濃,而我反而鐘意呢種味道,小食花干可以話係呢間鋪頭既必食,好似豆卜咁,裡面充滿湯汁,熱辣辣,非常好食！

食完牛肉麵後,就去下一個景點「松山文創園區」,由林東芳行去,差唔多二十分鐘,頭先食得太飽,行過去,順便消化下.行左廿分鐘,終於到左園區,梗係打番張卡先！

由於今日係平日,園區人流較少.入到去,主要有兩部分,一係文創館,二係誠品松菸大樓,今次主要黎既目的係後者.誠品係台灣最大型既書店,松山園區既分店都唔例外,面積有幾層.有書店,coffee shop ,餐廳,伴手禮區,係呢度行左一陣,完全感受到台灣人閱讀既氣氛！

行左大概兩個鐘,就離開左園區,前往下個景點！ 請留意part2