独游之旅～台北 Day2

黎到第二日,今次去边呢？好多人都话,第一次去台北,一定要去九分十分,就系咁,第二日就plan左去呢两个地方,听说九分十分系游客必去,应该会好多人.所以我就提早出发

 

九分同十分都系属于郊区,离台北市有一段车程.个人比较建议,先去十分,再去九分,交通上会方便得多,时间容易迁就！如果一个人去,可以先到台北车站,再转区间火车到瑞芳,再转火车到十分,全程约90分钟左右！建议上网揾定区间车既时间,方便转车,因为区间车既班次比较疏.大概一个钟,到左瑞芳车站,沿指示走到往菁桐方向既列车,呢架车非常有特色,好有乡郊特色风味,登上列车后,前往十分.

 

 

 

 

 

 

 

 

 

 

到咗十分后,竟然未见大量游客,可能时间尚早.第一件事,梗系医肚先,沿着十分路轨旁边,有间名为「烧烤鸡翅包饭」既小食档,眼看非常吸引,我都忍唔住买左一件试下,味道甜甜,有点辣.唔知系咪天气热,胃口不大,所以食咗一件之后冇再食！

 

 

 

 

食完之后,开始四周围行下,十分里面,有座「静安吊桥」非常出名,有少少摇晃,而且高,加上四周既景观,都非常吸引！

 

 

 

 

 

 

 

 

 

 

 

 

行完有点会脚震既吊桥,就去下个地方.十分其中一个活动,就系放天灯,不过我就冇放,因为一个人放,感觉好似有啲尴尬.不过,十分仲有一个景点,就系「十分瀑布」,要去呢个瀑布,一啲都唔易,要行成差唔多半个钟,不过,为左睇下呢个壮观既景点,行一阵都值得.经过半个钟既路程,终于黎到,一大阵既流水声,见证呢个宏伟既画面,企喺瀑布旁边,可以感受佢既威力,而且有水花,为炎热既夏天带来清凉！

 

 

 

 

 

 

喺瀑布下逗留左一阵,就准备离开十分,前往九分,喺十分车站上.有大量等列车既乘客,列车迫到沙甸鱼一样.终于挨到瑞芳车站,然后再转的士到九分.九分主要由九分老街组成,就好似千与千寻一样,好有特色,又窄又斜又多楼梯,真系要多加小心！黎到九份老街,主要黎行吓,影下相,但系,呢度有间「阿柑姨芋圆」非常出名,虽然我不太爱芋头,但难得一场黎到都要试下,我拣咗涷既芋圆,里面有芋头,蕃薯,绿豆汤,味道唔太甜,加上铺头有观光座位,望住窗外景,令呢碗芋圆有另一番味道！

 

 

 

 

 

 

 

 

 

 

 

 

 

 

阳光开始收埋,九份既行程亦结束.一开始话先去十份,再去九份,因为九份老街出面,系有巴士,直接番台北市中心.系巴士上,念下晚餐食咩好,记得之前睇过一位youtuber,拍左一间拉面店,评价唔错,于是今晚就食呢间拉面.位于双连站附近既「横滨家系拉面特浓屋」,去到时刚好唔洗等位,入到去,店员问我系咪第一次黎,我话系,于是讲解餐牌上既食物,非常热心.考虑左一阵,点左一碗豚骨拉面,一份炸鸡！大约十至十五分钟,野食到齐,拉面份量唔算多,但汤底非常浓郁,面条挂汤能力够,炸鸡表现同样唔错,皮薄馅靓.呢餐拉面食得非常满足,而且价钱唔贵,服务好,值得推介！

 

 

 

 

 

 

第二日就咁结束,第三日又会去边到呢？下篇会为大家介绍！