獨遊之旅～台北 Day2

黎到第二日,今次去邊呢？好多人都話,第一次去台北,一定要去九分十分,就係咁,第二日就plan左去呢兩個地方,聽說九分十分係遊客必去,應該會好多人.所以我就提早出發

 

九分同十分都係屬於郊區,離台北市有一段車程.個人比較建議,先去十分,再去九分,交通上會方便得多,時間容易遷就！如果一個人去,可以先到台北車站,再轉區間火車到瑞芳,再轉火車到十分,全程約90分鐘左右！建議上網搵定區間車既時間,方便轉車,因為區間車既班次比較疏.大概一個鐘,到左瑞芳車站,沿指示走到往菁桐方向既列車,呢架車非常有特色,好有鄉郊特色風味,登上列車後,前往十分.

 

 

 

 

 

 

 

 

 

 

到咗十分後,竟然未見大量遊客,可能時間尚早.第一件事,梗係醫肚先,沿着十分路軌旁邊,有間名為「燒烤雞翅包飯」既小食檔,眼看非常吸引,我都忍唔住買左一件試下,味道甜甜,有點辣.唔知係咪天氣熱,胃口不大,所以食咗一件之後冇再食！

 

 

 

 

食完之後,開始四周圍行下,十分裡面,有座「靜安吊橋」非常出名,有少少搖晃,而且高,加上四周既景觀,都非常吸引！

 

 

 

 

 

 

 

 

 

 

 

 

行完有點會腳震既吊橋,就去下個地方.十分其中一個活動,就係放天燈,不過我就冇放,因為一個人放,感覺好似有啲尷尬.不過,十分仲有一個景點,就係「十分瀑布」,要去呢個瀑布,一啲都唔易,要行成差唔多半個鐘,不過,為左睇下呢個壯觀既景點,行一陣都值得.經過半個鐘既路程,終於黎到,一大陣既流水聲,見證呢個宏偉既畫面,企喺瀑布旁邊,可以感受佢既威力,而且有水花,為炎熱既夏天帶來清涼！

 

 

 

 

 

 

喺瀑布下逗留左一陣,就準備離開十分,前往九分,喺十分車站上.有大量等列車既乘客,列車迫到沙甸魚一樣.終於捱到瑞芳車站,然後再轉的士到九分.九分主要由九分老街組成,就好似千與千尋一樣,好有特色,又窄又斜又多樓梯,真係要多加小心！黎到九份老街,主要黎行吓,影下相,但係,呢度有間「阿柑姨芋圓」非常出名,雖然我不太愛芋頭,但難得一場黎到都要試下,我揀咗涷既芋圓,裡面有芋頭,蕃薯,綠豆湯,味道唔太甜,加上鋪頭有觀光座位,望住窗外景,令呢碗芋圓有另一番味道！

 

 

 

 

 

 

 

 

 

 

 

 

 

 

陽光開始收埋,九份既行程亦結束.一開始話先去十份,再去九份,因為九份老街出面,係有巴士,直接番台北市中心.係巴士上,唸下晚餐食咩好,記得之前睇過一位youtuber,拍左一間拉麵店,評價唔錯,於是今晚就食呢間拉麵.位於雙連站附近既「橫濱家系拉麵特濃屋」,去到時剛好唔洗等位,入到去,店員問我係咪第一次黎,我話係,於是講解餐牌上既食物,非常熱心.考慮左一陣,點左一碗豚骨拉麵,一份炸雞！大約十至十五分鐘,野食到齊,拉麵份量唔算多,但湯底非常濃郁,麵條掛湯能力夠,炸雞表現同樣唔錯,皮薄餡靚.呢餐拉麵食得非常滿足,而且價錢唔貴,服務好,值得推介！

 

 

 

 

 

 

第二日就咁結束,第三日又會去邊到呢？下篇會為大家介紹！