熊金寶賺盡4.3%* 點解嘅？真嘅咩？證據呢?
作品集
日前，我用Grok（可以透過網路和 X 社群媒體平台獲得即時知識嘅AI）諮詢投資建議，點知佢竟然介紹StashAway畀我。
點解嘅？
- 係Grok AI從正常互聯網上抓取文章搵到StashAway資料？
- 定係StashAway畀錢Grok做推廣？
- AI有冇責任保障你嘅投資？
- AI又有冇辦法神準預測未來風險？
對於上面嘅問題，如你嘅答案係否定或者唔知，記住：「AI推介≠話買就買」！
喺Google搜尋StashAway，第一樣見到嘅係前財爺曾俊華，佢加入咗StashAway顧問委員會，仲做埋代言人。
點解嘅？
- 點解係前財爺做代言人？
- 前財爺代言有冇收酬勞？
- 如果蝕錢，前財爺會唔會賠畀你？
對於上面嘅問題，如你嘅答案係否定或者唔知，記住：「財爺代言 ≠ 買樓又買田」！
再搜落去，見到有個好吸引嘅宣傳：4.3%*熊金寶。StashAway幫你用美金買美債，4.3%係你一年回報！ 而且冇鎖定期! 嘩!有咁筍?
真嘅咩？
留意吓，「4.3%*回報」，重點唔係4.3%，係4.3%隔離個星號！本席溫馨提示：「星號細細把鐮刀，睇漏一眼錢就冇！」星號下面有行細字，條款寫住：「*Yield-to-Maturity as of 22 Apr 2025」，即係咩意思？即係話，截至2025年4月22日嘅到期收益率係4.3%。
- 而家已經5月30號啦，收益仲係唔係4.3%呢？
- 冇鎖定期，即係投資可以隨時彈出彈入？
- 如果你中途彈出唔玩，利率仲係唔係4.3%？會唔會蝕本？
- 如果用港幣兌美金去投資，如美金跌價，咁投資回報仲有冇4.3%？
對於上面嘅問題，如你嘅答案係否定或者唔知，記住：「4.3%≠4.3%」，你精我都精，計清條數唔使驚！
StashAway嘅熊金寶標榜比一般銀行美元定期利息高
證據呢?
本席認為，現有證據顯示如下：
- 根據StashAway官方網站提供之資料，"熊金寶"產品確實投資於短期美國國債（期限為0-3個月），其投資回報率與市場利率波動直接相關。
- 從金融專業角度分析，當美國市場利率下行時，投資人於贖回該產品時確實可能獲得較低之投資回報率。
- 關於廣告中宣稱"回報率可達4.3%"之陳述, 並無確切證據證明該產品在任何情況下均能維持4.3%之回報率。
- 有關廣告中比較銀行美元定期存款利率部分, 僅為特定時點之片面陳述, 未提供長期、全面之比較數據支持其持續優於銀行美元定存之主張。
綜上所述，本席認為該廣告陳述存在選擇性披露之嫌，未能全面反映產品之實際風險與回報特性。
本席溫馨提示：高息廣告似愛情——動人故事之上總有一顆星, 睇唔清就「掉那星」！
回應