熊金宝赚尽4.3%* 点解嘅？真嘅咩？证据呢?
作品集
日前，我用Grok（可以透过网路和 X 社群媒体平台获得即时知识嘅AI）咨询投资建议，点知佢竟然介绍StashAway畀我。
点解嘅？
- 系Grok AI从正常互联网上抓取文章揾到StashAway资料？
- 定系StashAway畀钱Grok做推广？
- AI有冇责任保障你嘅投资？
- AI又有冇办法神准预测未来风险？
对于上面嘅问题，如你嘅答案系否定或者唔知，记住：「AI推介≠话买就买」！
喺Google搜寻StashAway，第一样见到嘅系前财爷曾俊华，佢加入咗StashAway顾问委员会，仲做埋代言人。
点解嘅？
- 点解系前财爷做代言人？
- 前财爷代言有冇收酬劳？
- 如果蚀钱，前财爷会唔会赔畀你？
对于上面嘅问题，如你嘅答案系否定或者唔知，记住：「财爷代言 ≠ 买楼又买田」！
再搜落去，见到有个好吸引嘅宣传：4.3%*熊金宝。StashAway帮你用美金买美债，4.3%系你一年回报！ 而且冇锁定期! 哗!有咁笋?
真嘅咩？
留意吓，「4.3%*回报」，重点唔系4.3%，系4.3%隔离个星号！本席温馨提示：「星号细细把镰刀，睇漏一眼钱就冇！」星号下面有行细字，条款写住：「*Yield-to-Maturity as of 22 Apr 2025」，即系咩意思？即系话，截至2025年4月22日嘅到期收益率系4.3%。
- 而家已经5月30号啦，收益仲系唔系4.3%呢？
- 冇锁定期，即系投资可以随时弹出弹入？
- 如果你中途弹出唔玩，利率仲系唔系4.3%？会唔会蚀本？
- 如果用港币兑美金去投资，如美金跌价，咁投资回报仲有冇4.3%？
对于上面嘅问题，如你嘅答案系否定或者唔知，记住：「4.3%≠4.3%」，你精我都精，计清条数唔使惊！
StashAway嘅熊金宝标榜比一般银行美元定期利息高
证据呢?
本席认为，现有证据显示如下：
- 根据StashAway官方网站提供之资料，"熊金宝"产品确实投资于短期美国国债（期限为0-3个月），其投资回报率与市场利率波动直接相关。
- 从金融专业角度分析，当美国市场利率下行时，投资人于赎回该产品时确实可能获得较低之投资回报率。
- 关于广告中宣称"回报率可达4.3%"之陈述, 并无确切证据证明该产品在任何情况下均能维持4.3%之回报率。
- 有关广告中比较银行美元定期存款利率部分, 仅为特定时点之片面陈述, 未提供长期、全面之比较数据支持其持续优于银行美元定存之主张。
综上所述，本席认为该广告陈述存在选择性披露之嫌，未能全面反映产品之实际风险与回报特性。
本席温馨提示：高息广告似爱情——动人故事之上总有一颗星, 睇唔清就「掉那星」！
回应