【澳洲旅行】维多利亚省大洋路一日游

提到澳洲，通常都会谂起悉尼、墨尔本等等既大城市，但其实除左游览城市之外，澳洲既自然景色亦系澳洲旅行既一大重点。而澳洲其中一个热门自然观光胜地就系位于维多利亚省既大洋路。本人最近就系墨尔本参加左一个去大洋路既tour，所以想同大家分享下我既经验。

分享之前，简单介绍下大洋路呢个地方先。其实大洋路系澳洲南边既一条绵延约400公里既沿海公路，因为沿途可以见到一望无际既海景、沙滩、奇岩怪石等等而闻名。呢条公路距离墨尔本市中心大约90分钟车程，所以如果要去既话就要自己揸车又或者好似我咁报local tour. 报团可以经网上又或者经当地旅行社，价钱大概100蚊澳币（500几蚊港纸），亦有D旅行社可以再平D。

我当日既行程系九点钟系墨尔本市中心集合，参加人数大概十人左右。人齐之后就上左一架van仔，然后司机兼导游就开始讲解行程同埋向大洋路出发。司机系一个好风趣同尽责既人，沿途不时同我地倾计同介绍当地历史故事，所以旅途上都学到D野。

经过个几钟车程，终于到左大洋路附近，司机仲特登系加油站停低比我地买下野食同去下厕所，小休之后再继续出发。再坐多一阵车，终于到左大洋路既入口（Memorial Arch），附近有一个纪念第一次世界大战士兵回国既雕像，同埋一个好多人影相既海滩。老实讲，睇既野其实唔多，但司机都好尽责咁介绍。之后架车就沿住大洋路而行，途中亦有影相位比我地落车，但主要睇既都系海同沙滩，差别只系在于系唔同既位置同角度睇。

旅程既高潮算系之后去到既Kennett River，一个可以比你睇到野生鹦鹉同树熊既地方。司机仲预备左雀粟比我地喂雀，而且提醒我地果度既鹦鹉有两种，一种系红绿色既parrot, 另一种系白色有冠既cockatoo，前者比较温驯但后者就有少少攻击性会啄人。红绿色既更加完全唔惊人，见到你有野食会主动停系你手或膊头（又或者头上），游客都喂得好开心。可惜既系当日既树熊得一只，而且停左系好高既树上面，基本上只可以影完相望两望就算。Kennett River附近仲有一间小cafe，所以午餐就系果度食埋，食下意粉、炸鱼薯条之类。

之后既行程其实同上昼差唔多，都你沿大洋路行，系唔同既地方影差唔多既风景。当中比较值得一提既系Loch Ard Gorge海滩同埋附近既十二门徒石（12 Apostles）。前者系一个自然形成既封闭式海滩，而后者系大洋路最出名，最多人睇，竖立系海边既多块巨石，系大洋路既必到景点。睇完呢个景点之后，旅程亦算结束，大家上车回程到市中心。当晚返到市中心时间大约九点，计返整个行程用左足足十二个钟。

整体黎讲，其实旅程都算几有趣，因为可以见到好多平时系城市见唔到既景色。但可惜我自问唔系一个非常热爱大自然既人，好多景色对我而言都比较重复，再加上车程，有时都觉得几闷下。不过如果你黎到墨尔本，我都系会推介既，因为始终系热门景点。但如果你同我一样唔算系大自然爱好者，又唔系好多时间既话，我谂就要考虑下啦。