关二妹的废青二三事 ─ 初游越南河内（一）

越南俾人嘅感觉系咩？就系你咁啱抽起条旅行瘾，但望下银行户口又唔够钱去废青最钟意去嘅日本，就会醒起：「啊，未去过越南，去下都好㖞。」今次为咗迁就系学校工作嘅同行旅人，仲特登挨贵机票，选择（其实都无得拣）系复活假飞，搭廉航jetstar来回，机票钱都成二千几蚊架……（够我淡季飞转日本…）所以其实今趟绝对唔属于穷游类别。
如果你google search河内有咩玩，你会发现其实呢个地方无咩新奇刺激嘅野，网上面最推嘅就系下龙湾（Ha Long Bay），但我同旅人相讨过之后，决定唔去呢个地方，因为旅人对水上游乐设施无兴趣，第二就系车程太长，而最重要嘅就系伏味太浓，太㓥游客（但其实越南逢系游客区都一定会㓥）。
＜历史爱好者必到之地：火炉监狱 Maison Centrale＞
相信大家都知道，越南系十九世纪果阵同好多东南亚国家一样，都系法国殖民地，当法国侵占
呢个地方嘅时候，啲原居民紧系唔妥你架啦，就好似当年香港吉庆围嘅村民唔接受英国统治佢地一样，坚持反抗，但最后越南人嘅下场同吉庆围村民嘅截然不同。当时法国决定兴建一座监狱，将所有对抗政府嘅政治犯全部困系监狱到，拷问、虐待呢啲对付手法当然少不免，有啲罪名较为严重的囚犯，更加会被困系单独囚室，无窗无光无人同你讲野，务求摧残反抗者嘅心灵之余，亦起到杀一儆百嘅作用。
无论系真实历史、抑或按照TBB剧情发展推论，呢班热爱国家嘅越南人又点会屈服于强权底下呢？所以系呢个监狱到，可以睇到好多歌颂革命烈士嘅展品同相片，描述当时的越南人即使面对住强大的打压，亦都继续坚守住自己的反法理想同革命理念，系1945年终于脱离法国，成为独立国。
不过，独立成国嘅越南后黎发展都唔系一帆风顺，北面的越共同得到美国支持的南越展开内战，而呢个火炉监狱亦都成为咗越共关押战俘的地方。有趣嘅系参观到监狱嘅最后部份，好多相片同展品都系讲解当时美国人嘅良好待遇，例如系圣诞节佢地会画画装饰、甚至有得踢波消遣等，不过共产党对付战俘同异见份子的手法都出哂名心狠手辣（有兴趣可以search下柬埔寨的红色高棉），至于系真定假，就留待大家去判断。
总括黎讲，我觉得呢个监狱博物馆都唔错，入场费好似系大约$30,000盾，价钱黎讲就绝对唔贵，不过为咗呈现以前法国佬点残酷对待越南人，啲囚犯嘅塑像其实都几迫真，而且因为馆内主要靠自然光，又无乜窗嘅关系，变相成个感觉就更加阴森恐怖。二妹行到单独囚室，谂住透过个囚室门个窿「装」入去睇果阵，俾入面的囚犯塑像吓咗一跳（我认我细胆，所以无乜影到监狱入面，请大家见谅），所以都系几特别嘅体验黎。对于呢段历史有兴趣嘅朋友，呢个博物馆值得一去。
温馨提示：系越南记得down Grab（即系越南版Uber黎用），二妹同旅人做惯行路L，都表示大热天时咁行都几顶唔紧。