關二妹的廢青二三事 ─ 初遊越南河內(一)

關二妹

越南俾人嘅感覺係咩?就係你咁啱抽起條旅行癮,但望下銀行戶口又唔夠錢去廢青最鍾意去嘅日本,就會醒起:「啊,未去過越南,去下都好喎。」今次為咗遷就係學校工作嘅同行旅人,仲特登捱貴機票,選擇(其實都無得揀)係復活假飛,搭廉航jetstar來回,機票錢都成二千幾蚊架……(夠我淡季飛轉日本…)所以其實今趟絕對唔屬於窮遊類別。
如果你google search河內有咩玩,你會發現其實呢個地方無咩新奇刺激嘅野,網上面最推嘅就係下龍灣(Ha Long Bay),但我同旅人相討過之後,決定唔去呢個地方,因為旅人對水上遊樂設施無興趣,第二就係車程太長,而最重要嘅就係伏味太濃,太劏遊客(但其實越南逢係遊客區都一定會劏)。
<歷史愛好者必到之地:火爐監獄 Maison Centrale>
相信大家都知道,越南係十九世紀果陣同好多東南亞國家一樣,都係法國殖民地,當法國侵佔
呢個地方嘅時候,啲原居民緊係唔妥你架啦,就好似當年香港吉慶圍嘅村民唔接受英國統治佢地一樣,堅持反抗,但最後越南人嘅下場同吉慶圍村民嘅截然不同。當時法國決定興建一座監獄,將所有對抗政府嘅政治犯全部困係監獄到,拷問、虐待呢啲對付手法當然少不免,有啲罪名較為嚴重的囚犯,更加會被困係單獨囚室,無窗無光無人同你講野,務求摧殘反抗者嘅心靈之餘,亦起到殺一儆百嘅作用。
無論係真實歷史、抑或按照TBB劇情發展推論,呢班熱愛國家嘅越南人又點會屈服於強權底下呢?所以係呢個監獄到,可以睇到好多歌頌革命烈士嘅展品同相片,描述當時的越南人即使面對住強大的打壓,亦都繼續堅守住自己的反法理想同革命理念,係1945年終於脫離法國,成為獨立國。
不過,獨立成國嘅越南後黎發展都唔係一帆風順,北面的越共同得到美國支持的南越展開內戰,而呢個火爐監獄亦都成為咗越共關押戰俘的地方。有趣嘅係參觀到監獄嘅最後部份,好多相片同展品都係講解當時美國人嘅良好待遇,例如係聖誕節佢地會畫畫裝飾、甚至有得踢波消遣等,不過共產黨對付戰俘同異見份子的手法都出哂名心狠手辣(有興趣可以search下柬埔寨的紅色高棉),至於係真定假,就留待大家去判斷。
總括黎講,我覺得呢個監獄博物館都唔錯,入場費好似係大約$30,000盾,價錢黎講就絕對唔貴,不過為咗呈現以前法國佬點殘酷對待越南人,啲囚犯嘅塑像其實都幾迫真,而且因為館內主要靠自然光,又無乜窗嘅關係,變相成個感覺就更加陰森恐怖。二妹行到單獨囚室,諗住透過個囚室門個窿「裝」入去睇果陣,俾入面的囚犯塑像嚇咗一跳(我認我細膽,所以無乜影到監獄入面,請大家見諒),所以都係幾特別嘅體驗黎。對於呢段歷史有興趣嘅朋友,呢個博物館值得一去。
溫馨提示:係越南記得down Grab(即係越南版Uber黎用),二妹同旅人做慣行路L,都表示大熱天時咁行都幾頂唔緊。

WRITTEN BY

關二妹

集所有廢青特徵於一身的人。(FB:關二妹的廢青二三事)

投稿分享你的故事 - 成為HKESE 自由作家
馬上投稿分享創作
香港新世代求職招聘平台,自由工作者平台,致力推動香港新工作模式,創造年青人才社群,滿足新世代及僱主的求職徵才需要。平台支持各類全職、兼職 Part-time、Freelance、合約及短期工作的求職招聘。
Copyright © 2019 HKESE
myspace tracker